Brıýsselde EO-nyń joǵary laýazymdy dıplomattary ustaldy
ASTANA. KAZINFORM — Belgııa polıtsııasy seısenbi kúni Eýropalyq syrtqy is-qımyl qyzmetinde (ESІQ), sondaı-aq Brıýgge qalasyndaǵy «Eýropa kolledji» oqý ornynda EO qarajatynyń maqsatsyz paıdalanylýyn tergeý aıasynda birqatar nysanǵa tintý júrgizdi, dep habarlaıdy Kazinform agenttiginiń menshikti tilshisi.
Eýrokomıssııanyń burynǵy vıtse-prezıdenti, «Eýropa kolledjiniń» basshysy Federıka Mogerını men Stefano Sannıno, ESІQ-nyń burynǵy Bas hatshysy jáne DG MENA dıplomatııalyq qyzmet basqarmasynyń qazirgi basshysy (Taıaý Shyǵyspen baılanys úshin jaýapty) ustalǵany habarlandy.
Búgin tańerteń Belgııa boıynsha reıdter júrgizildi: polıtsııa qujattardy tárkiledi jáne satyp alý alaıaqtyǵy, sybaılas jemqorlyq pen qylmystyq múddeler qaqtyǵysy kúdigimen úsh adamdy jaýap alý úshin tutqyndady.
Kýágerlerdiń aıtýynsha, seısenbi kúni tańǵy saǵat 7:30–da shamamen 10 azamattyq kıim kıgen ofıtser Eýropalyq syrtqy is-qımyl qyzmetiniń shtab-páterine kirgen.
Eýropalyq syrtqy is-qımyl qyzmeti (ESQQ) — Eýropalyq Odaqtyń syrtqy saıasat agenttigi, ony 2019 jylǵa deıin Eýropalyq Komıssııanyń burynǵy vıtse-prezıdenti Federıka Mogerını basqardy. 2020 jyldan bastap ol bolashaq EO sheneýnikterin oqytý ortalyǵy sanalatyn Eýropa kolledjiniń rektory qyzmetin atqardy.
Belgııalyq L’Echo gazeti Mogerınıdiń qamaýda ekenin habarlady, biraq kolledj túsinik berýden bas tartty.
Eýropalyq prokýratýra Eýropa kolledjinde dıplomatııalyq akademııa qurýǵa arnalǵan tenderdi Eýropalyq syrtqy saıasat qyzmeti jeńip alý kezinde «ádil báseke erejeleri buzylǵan bolýy múmkin» degen kúdigi bar ekenin habarlady.
Tergeý kolledjge resmı habarlama jarııalanǵanǵa deıin tenderdi irikteý krıterııleri týraly habarlanǵan ba, joq pa sony tekserýge baǵyttalǵan.
Aty-jónin atamaýdy qalaǵan Eýropalyq syrtqy is-qımyl qyzmetiniń (ESQQ) ókili Politico basylymyna tintýler Brıýsseldegi Shýman aınalma jolyndaǵy negizgi ǵımaratta emes, 62 Rue d’Arlon mekenjaıyndaǵy ákimshilik keńse ǵımaratynda júrgizilgenin aıtty.
Qyzmetkerlerden esikterin nemese jıhazdaryn qulyptamaı ǵımarattan shyǵý suraldy.
EO-nyń joǵary laýazymdy sheneýnigi Politico basylymyna bergen suhbatynda tintýler Kaıa Kallas bloktyń syrtqy saıasat jónindegi basshysy qyzmetine kirispes buryn bastalǵan tergeýge qatysty ekenin aıtty.
Eýropalyq prokýratýra (EPPO) tergeý bastalǵanǵa deıin bılik organdarynan dıplomattarǵa beriletin, olardy qýdalaýdan qorǵaıtyn ımmýnıtetti «birneshe kúdikti» úshin alyp tastaýdy suraǵanyn jáne bul ótinish qanaǵattandyrylǵanyn málimdedi. Keńse ótinishterdiń qaı organdarǵa jiberilgenin naqtylamady.
Budan buryn Brıýsselde esirtki mafııasy qoqan-loqy jasaǵan prokýrorǵa arnaıy kúzet qoıylǵany belgili boldy.