Brıýsselde EO — Qazaqstan qarym-qatynasyn damytýǵa arnalǵan jańa platforma iske qosyldy
ASTANA. KAZINFORM — Seısenbi kúni Brıýssel qalasynda «Kazakhstan–EU Gateway» («Qazaqstan–EO portaly») atty jańa uıymnyń tusaýkeseri ótti, dep habarlaıdy Kazinform agenttiginiń menshikti tilshisi.
Eýropanyń qaq ortasynda qurylǵan jańa úkimettik emes uıym Eýropalyq odaq pen Qazaqstan arasyndaǵy qatynasty nyǵaıtýǵa baǵyttalǵan.
«Kazakhstan–EU Gateway» uıymynyń jetekshisi Valıhan Bahretdınov Kazinform agenttigine bergen suhbatynda ÚEU-nyń alǵashqy is-sharasy EO men Qazaqstan Respýblıkasy arasyndaǵy strategııalyq áriptestikti, atap aıtqanda, asa mańyzdy shıkizat materıaldary salasyndaǵy yntymaqtastyqty talqylaýǵa arnalǵan dóńgelek ústel bolǵanyn aıtty.
— Biz Keńeıtilgen áriptestik pen yntymaqtastyq týraly kelisimge qol qoıylǵanyna 10 jyl tolar qarsańynda ekijaqty dıalogtyń qorytyndysyn shyǵarý mańyzdy dep sanaımyz. Sondyqtan búgin Eýropalyq odaqtyń júreginde EO men Qazaqstan arasyndaǵy asa mańyzdy shıkizat materıaldary salasyndaǵy yntymaqtastyqqa arnalǵan dóńgelek ústel ótkizip otyrmyz. Bul ekijaqty kún tártibindegi óte ózekti ári mańyzdy taqyryp. Sonymen qatar, is-sharamyz Eýropalyq keńes tóraǵasy Antonıý Koshtanyń jýyrdaǵy Qazaqstanǵa saparynyń qorytyndylaryna arnaldy. Atalǵan sapar da baılanystarymyzdy keńeıtýge yqpal etti, — dedi V. Bahretdınov.
Tusaýkeser jergilikti dıplomatııalyq jáne sarapshylyq orta tarapynan joǵary qyzyǵýshylyq týdyrdy. Іs-sharaǵa tómendegi tulǵalar qatysty:
* Eýropalyq syrtqy áreket qyzmetiniń asa mańyzdy shıkizat materıaldary jónindegi bas keńesshisi Lıýk Devın;
* Chehııadan saılanǵan Eýroparlament depýtaty Ondreı Dostal (táýelsiz depýtat);
* Frantsııadan saılanǵan Eýroparlament depýtaty Per Pımpı («Eýropa úshin patrıottar» fraktsııasy);
* Belgııanyń Qazaqstandaǵy burynǵy elshisi Anrı Vantıgem.
Ortalyq Azııa elderimen dıplomatııalyq salada mol tájirıbesi bar Lıýk Devın EO men Qazaqstan arasyndaǵy asa mańyzdy shıkizat materıaldary salasyndaǵy yntymaqtastyqtyń negizgi úrdisterin atap ótti. Eýropalyq syrtqy áreket qyzmetiniń ókili erekshe túrde bıyl jeltoqsan aıynda Brıýsselde ótken «Asa mańyzdy shıkizat aptalyǵynyń» qorytyndylaryn atap ótip, oǵan Qazaqstannyń úkimettik delegatsııasy qatysqanyn aıtty.
Eýroparlament depýtaty O. Dostal da Eýropalyq odaq úshin Qazaqstanmen asa mańyzdy shıkizat materıaldary salasynda yntymaqtastyq ornatýdyń mańyzdylyǵyn atap ótti. Sonymen qatar ol konferentsııa barysynda Eýropada qyzyǵýshylyǵy artyp kele jatqan «Orta dáliz» kólik jobasynyń talqylanǵanyn jetkizdi.
Paneldik sessııada sondaı-aq Stefanııa Benaglııa — syrtqy saıasat jónindegi sarapshy, «Qazaqstan–EO portaly» konsýltatıvtik keńesiniń múshesi; Saıran Baıjahanov — QR Indýstrııa jáne qurylys mınıstrliginiń ókili; Peter Tom Djoýns — «KU Leuven» ýnıversıtetiniń sarapshysy; Djon Roberts — energetıkalyq qaýipsizdik jónindegi sarapshy jáne geosaıasat pen energetıka salasyndaǵy sarapshy Marat Terterov sóz sóıledi.