Brıýsselde elıtaly sportklýbtardan qymbat saǵat urlaǵan er adam ustaldy
ASTANA. KAZINFORM- Belgııa astanasynda jergilikti polıtsııanyń málimetinshe, eldegi elıtaly sportklýbtardan zergerlik buıymdar men premıým sanattaǵy saǵattardy urlaǵan er adam ustaldy. Keltirilgen shyǵyn ondaǵan myń eýrony quraıdy, dep habarlaıdy Kazinform agenttiginiń menshikti tilshisi.
Kúdiktini tamyz aıynda Montgomerı polıtsııa aımaǵynyń (Etterbek, Volıýve-Sen-Per jáne Volıýve-Sen-Lamber kommýnalary) qyzmetkerleri ustaǵan.
Sol kúni qylmysker Belgııa astanasynyń Volıýve-Sen-Lamber kommýnasyndaǵy qymbat sportklýbtardyń birine múshelik rásimdeý úshin kelgen. Kelýshiniń áreketi klýb menedjeriniń kúdigin týǵyzǵan. Ol er adamdy buryn jasalǵan urlyqtarǵa qatysty beınebaqylaý jazbalarynan tanyp, polıtsııa shaqyrǵan.
Tergeý nusqasyna sáıkes, kúdikti bir shema boıynsha áreket etken. Ol klýbqa kirip, kıim aýystyratyn bólmelerge jáne kelýshiler jeke zattaryn qaldyratyn basqa da oryndarǵa barǵan. Sodan keıin qymbat zattardy izdegen. Keıbir jaǵdaılarda saǵattar men qundy zattar kodpen jabylatyn shkaftardan joǵalyp ketken.
Detektıvter ustalǵan er adamdy Belgııanyń ártúrli sportklýbtarynda bolǵan taǵy úsh urlyq deregimen baılanystyrdy. Kúdikti Brıýssel prokýratýrasyna tapsyrylyp, keıin tergeý sýdıasynyń aldyna keldi jáne kinásin moıyndady.
Montgomerı polıtsııa aımaǵynyń qyzmetkerleri klýb jumysshylarynyń qyraǵylyǵy men polıtsııa qyzmetteri arasyndaǵy ózara is-qımyldyń mańyzyn atap ótti. Belgııa polıtsııasy kıim aýystyratyn bólmelerdegi jabyq shkaftar kelýshilerdiń zattarynyń tolyq saqtalýyna árdaıym kepildik bere bermeıtinin de eskertti.
Osyǵan deıin Túrkııada ınternettegi qylmystyq toptarǵa qarsy arnaıy operatsııa bastalǵany týraly jazdyq.
