Brıýsselde alǵash ret Ortalyq Azııa – Eýropa shyǵarmashylyq forýmy ótip jatyr
ASTANA.KAZINFORM – Osy aptada Eýropa astanasynda Ortalyq Azııanyń bes elinen kelgen birqatar dızaınerler men shyǵarmashylyq tulǵalardyń bastamasymen Ortalyq Azııa – Eýropa shyǵarmashylyq forýmy bastaldy. Bul týraly Brıýsselden Kazinform menshikti tilshisi Arnur Rahymbekov habarlaıdy.
Osy bastama aıasynda qazaqstandyq zergerlerdiń «Almaty zergerlik aptalyǵy» jobasy tanystyrylyp jatyr.
Brıýsselge Ortalyq Azııanyń barlyq respýblıkalarynan, onyń ishinde Qazaqstannan 12 dızaıner kelip, óz jumystary men jobalaryn Eýropalyq syrtqy is-qımyl qyzmetinde (EO dıplomatııalyq organy), sondaı-aq Belgııadaǵy Túrikmenstan elshiliginde usyndy.
Aldaǵa kúnderi kórme Eýropalyq parlamentte, Brıýssel men Antverpen qalalarynyń murajaılarynda ótedi.
Ortalyq Azııa – Eýropa kreatıvti forýmynyń bastamashysy Elena Van Harıtonova is-sharany uıymdastyrý jumystarymen birneshe aı boıy aınalysqanyn aıtady.
- Bes kún ishinde qatysýshylar mádenı dıplomatııa jáne halyqaralyq mádenı baılanystar álemine enip, birtutas shyǵarmashylyq aımaq retinde Ortalyq Azııaǵa erekshe nazar aýdarady. Qatysýshylarymyz EO syrtqy saıasatynyń negizgi aspektilerimen jáne Eýroparlamenttiń aımaqqa degen kózqarasymen tanysýǵa múmkindik alady. Mádenı dıplomatııa – júrekter men oılardy jaýlaý, halyqaralyq mádenı qarym-qatynastar – ózara yntymaqtastyq pen múddelerge negizdelgen birlesken is-áreketter men syndarly yntymaqtastyq. Bizdiń forýmda biz praktıkalyq jaǵdaılar men daǵdylardy paıdalana otyryp, kelissózder júrgizýdi, qazirgi jyldam ózgeretin álemde strategııalyq baılanystardy qurýdy úırenemiz. Óz elderi men mádenıetteriniń jaýapty elshileri sanalatyn shyǵarmashylyq mamandar úshin dıplomatııalyq daǵdylar óte mańyzdy, - deıdi Elena Van Harıtonova.
Eýroodaq astanasyna Qazaqstannan almatylyq sýretshi-zerger Nurdos Álıasqarov bardy.
— Búgin Brıýssel qalasynda ótken sharalarǵa Qazaqstan, Qyrǵyzstan, Túrkimenstan, Ózbekstan sııaqty elderdiń ókilderi qatysty. Bul – Eýropalyq Odaq ǵımaratyndaǵy osyndaı formattaǵy alǵashqy forým ekenin aıtqym keledi. Biz osyndaı forým bolashaqta jyl saıyn ótkiziletindeı deńgeıge jetkenin qalaımyz. Munda shyǵarmashylyq adamdar arasyndaǵy "mádenı dıplomatııa" sııaqty shyǵarmashylyq sátter talqylanady, oǵan saıasatqa qatysy joq jáne tek shyǵarmashylyqpen aınalysatyn óz isiniń sheberleri, sýretshiler, zergerler qatysyp, bas qosady. Keremet mádenı almasý júrip jatyr jáne osyǵan baılanysty búgin Eýroodaqtyń júreginde "Almaty Jewelry Week" jobasy tanystyrylǵanyn atap ótkim keledi. Bul platforma damyp, jańa qatysýshylardy tartady jáne osylaısha biz óner arqyly úlken odaq quramyz. Bul halyqaralyq joba bolady. Mundaı mádenıetti kelesi urpaqqa, ıaǵnı jastarǵa qaldyrý úshin osy forýmnyń jumysyn damytý qajet, - dedi Nurdos Álıasqarov.
