Brıýsselde 60 myńǵa jýyq adam klımatty qorǵaýdy talap etip, sherýge shyqty
ASTANA. KAZINFORM – Belgııa astanasy Brıýsselde ondaǵan myń adam klımattyń ózgerýine qarsy naqty sharalar qabyldaýdy talap etip, sherýge shyqty. Narazylyq aktsııasy BUU-nyń klımat jónindegi COP31 konferentsııasy qarsańynda ótti, dep habarlaıdy Euronews.
Sherý qatysýshylary qala kóshelerimen júrip ótip, Eýropalyq odaqtyń shtab-páterine qaraı bet aldy. Olar bılikten jahandyq jylynýǵa qarsy kúresti kúsheıtip, ekologııalyq máselelerdi saıası kún tártibindegi basty baǵyttardyń biri retinde qarastyrýdy talap etti.
Polıtsııa málimetinshe, sherýge 45 myń adam qatysqan. Al uıymdastyrýshylar olardyń sany 60 myńǵa jýyqtaǵanyn málimdedi.
Aktsııany Climate Coalition qozǵalysy basqa da qoǵamdyq jáne saıası uıymdarmen birlesip uıymdastyrdy.
Sherýge qatysýshylar bes negizgi talap qoıdy. Atap aıtqanda, qazba otynǵa beriletin sýbsıdııalardy toqtatý, osy salaǵa qosymsha salyq engizý, jasyl aımaqtardy kóbeıtý, ekologııalyq ózgeristerdiń áleýmettik turǵydan ádil júrgizilýin qamtamasyz etý, azamattar men kásipkerlerge qoldaý kórsetý jáne halyqaralyq klımattyq yntymaqtastyqty kúsheıtý usynyldy.
Flandrııa men Brıýsseldegi «Jasyldar» partııasynyń tóraǵasy Aımen Horhtyń aıtýynsha, Eýropadaǵy aptap ystyq pen orman órtteri klımattyń ózgerýi kúndelikti ómirge tikeleı áser etip jatqanyn kórsetti.
– Adamdar aptap ystyqtan kóz jumdy. Úıleriniń ishi sonshalyq ysyp, túnde uıyqtaı almaıtyn jaǵdaıǵa jetti. Olar eldegi mańyzdy tabıǵı qoryqtardyń biri – Joǵary Fennde orman órtteri bolǵanyn kórdi. Biraq bılik tarapynan tıisti sharalar qabyldanbaǵanyna kýá boldy, – dedi ol.
Aımen Horh klımat máselesiniń saıası kún tártibinen shettep bara jatqanyna alańdaýshylyq bildirdi.
Onyń sózinshe, klımattyq maqsattardy qorǵaý úshin Eýroparlamentte de, Belgııanyń ózinde de kúres júrgizýge týra keledi. Óıtkeni aptap ystyq pen klımattyń ózgerýiniń adamdar ómirine áseri áli de ózekti.
Sherýge qatysqan ekonomıst Eten de Kallataı qoǵamda klımattyń ózgerýine qatysty alańdaýshylyq kúsheıgenin aıtty.
– Bıylǵy jazdaǵy aptap ystyqtyń áserin bárimiz sezindik. Sondyqtan saıasatkerler ekologııa salasynda batyl sheshim qabyldaýdan jáne onyń saılaý nátıjesine yqpal etýinen qoryqpaýy kerek, – dedi ol.
Al úkimettik emes uıym qyzmetkeri Aýror Shraıber sherýge otbasymen birge kelgenin aıtyp, bıliktiń azamattar talabyna qulaq asatyn kezi jetkenin jetkizdi.
Narazylyq aktsııasy qarasha aıynda Túrkııanyń Antalıa qalasynda ótetin BUU-nyń COP31 klımat konferentsııasy qarsańynda uıymdastyryldy.
Alaıda sarapshylar aldaǵy jıynnan aıtarlyqtaı nátıjeler kútý qıyn ekenin aıtady. Buǵan AQSh-tyń klımat jónindegi halyqaralyq kelissózderden shetteýi jáne Eýropada ekologııalyq saıasattyń báseńdeýi áser etip otyr.
Eýropalyq odaq ózin klımat salasyndaǵy álemdik kóshbasshylardyń biri retinde kórsetkenimen, sońǵy ýaqytta birqatar ekologııalyq talaptardy jeńildetýge kiristi.
Máselen, qyrkúıekte Eýrokomıssııa metan shyǵaryndylaryn retteıtin zańnyń kúshine ený merzimin 2027 jyldan 2028 jylǵa aýystyrýdy usynǵan.
Aıta keteıik, buǵan deıin 2026 jyldyń maýsym jáne shilde aılarynda Batys Eýropada aýa temperatýrasy rekordtyq deńgeıge jetkeni habarlanǵan bolatyn. Osy kezeńde ortasha temperatýra 21,62 gradýsqa kóterilip, klımattyq normadan 2,79 gradýsqa joǵary boldy.
