Brıýssel jalǵa beriletin elektrosamokattarǵa tolyq tyıym salady
ASTANA. KAZINFORM - Belgııa astanasy Brıýsselde jalǵa beriletin elektrosamokattar kóshelerden tolyqtaı alynyp tastalady. Tıisti sheshimdi Brıýssel astanalyq óńiriniń bıligi qabyldady. Tyıym 2027 jyldan bastap kúshine enedi, dep habarlaıdy Kazinform agenttiginiń Belgııadaǵy menshikti tilshisi jergilikti Belga agenttigine silteme jasap.
Jergilikti bılik mundaı qadamǵa birneshe sebep bolǵanyn málimdedi. Solardyń biri - elektrosamokattardyń qatysýymen bolatyn jol-kólik oqıǵalary kóbeıgen jáne atlǵan kólik túri jaıaý júrginshilerge qolaısyzdyq týǵyzady jáne ony qylmystyq toptar da kóp paıdalanatyn bolǵan.
Bılik dereginshe, esirtki saýdasymen aınalysatyndar elektrosamokattardy qala ishinde jyldam qozǵalý jáne polıtsııadan qashý úshin qoldanady.
Belga agenttiginiń málimetine sáıkes, 2025 jyly Brıýssel óńirinde elektrosamokattardyń qatysýymen bolǵan jol apattarynan 666 adam zardap shekken. Bul bir jyl burynǵy kórsetkishten 25 paıyzdan astam joǵary.
Qaýipsizdik máselesi de sheshim qabyldaýda mańyzdy ról atqardy. Brıýssel prokýrory Jıýlen Mýanıl sońǵy ýaqytta ortaq paıdalanýǵa beriletin elektrosamokattar qaladaǵy keminde 25 atys oqıǵasynan keıin kúdiktilerdiń oqıǵa ornynan tez ketý quraly retinde paıdalanylǵanyn málimdedi.
Qazir mıkromobıldi qyzmet kórsetetin Bolt pen Dott kompanııalarymen jasalǵan kelisimsharttardyń merzimi 2026 jyldyń sońynda aıaqtalady. Óńir bıligi jańa lıtsenzııalar berilmeıtinin habarlady.
Soǵan qaramastan Brıýssel ekologııalyq kólik túrlerinen bas tartpaıdy. Qaladaǵy Villo! velosıpedterdi jalǵa berý júıesi 2028 jyldyń qyrkúıegine deıin jumys isteıdi.
Keıinirek bılik Brıýsseldiń barlyq kommýnalarynda turaqty aıaldaý beketteri bar biryńǵaı elektr velosıpedteri júıesin iske qosýdy josparlap otyr.
Osylaısha Brıýssel jeke mobıldik quraldaryna qoıylatyn talaptardy kúsheıtip jatqan eýropalyq qalalardyń qataryna qosyldy. Buǵan deıin Parıj, Madrıd jáne Praga qalalarynda da elektrosamokattardy jalǵa berý qyzmetine tolyq nemese ishinara shekteýler engizilgen.
Al Bishkek jýyrda elektrsamokattardyń jyldamdyǵyn shektegen bolatyn.
