Brıýssel marafonyna 15 myńnan astam adam qatyspaq
BRıÝSSELЬ. QazAqparat - Búgin Belgııa astanasynda esep boıynsha 12-shi dástúrli jeńilatletıkalyq halyqaralyq marafon ótedi. Oǵan álemniń 66 elinen 15 myńnan astam áýesqoı sportshynyń qatysýy kútilip otyr.
Uıymdastyrýshylardyń aıtýynsha, 42 shaqyrymdyq baǵdar Brıýsseldiń ortalyq jáne shyǵys bólikterimen ótedi. Osyǵan baılanysty qalanyń negizgi joldaryndaǵy qozǵalys jergilikti ýaqyt boıynsha saǵat 08:00-den 14:00-ge deıin jartylaı toqtatylmaq.
Qashyqtyǵy 42 shaqyrymdy quraıtyn negizgi marafonnan basqa, sondaı-aq jartylaı marafon (21 shaqyrym), shaǵyn marafon (5 shaqyrym) jáne balalarǵa arnalǵan júgirý (1 shaqyrym) ótedi.
Marafon ótkizýdiń 11 jylynda erler arasyndaǵy jarysta 9 ret Kenııa atletteri jáne nebári 2 ret belgııalyq qatysýshylardyń jeńimpaz bolǵanyn atap ótý kerek.
Áıelder arasyndaǵy jarysta 4 ret Kenııanyń názik jandylary, 3 ret belgııalyq áıelder jeńiske jetti, sondaı-aq Danııa, Nıderlandy, Frantsııa jáne Shveıtsarııa sportshylarynyń enshisinde bir jeńisten bar.
