Brıýssel EO azamattarynan «dabyl qobdıshasyn» jınaýyn ótindi

ASTANA. KAZINFORM – Brıýssel EO-ǵa múshe árbir memleketten óz turǵyndary úshin úsh kúnge eseptelgen «aman qalýdyń apattyq jınaǵyndaǵy» zattardyń tizimin jasaýdy talap etip otyr. Bul Preparedness Union Strategy – Eýroodaqtyń yqtımal daǵdarystarǵa daıyndyq strategııasy tarmaqtarynyń biri, dep habarlaıdy euronews. 

Ol sondaı-aq birinshi qajettiliktegi zattar qoryn kóbeıtýdi jáne áskerı-azamattyq yntymaqtastyqty nyǵaıtýdy kózdeıdi. 

Eýropalyq komıssııa sársenbide usynǵan strategııa EO-ǵa múshe memleketter tabıǵı apattar men óndiristik apattardan bastap kıbershabýyldar men áskerı qaqtyǵystarǵa deıingi birqatar tótenshe jaǵdaılarǵa daıyndyǵyn arttyrý úshin qabyldaýy tıis 30 naqty is-árekettiń tizimin qamtıdy.

— Eýroodaqtaǵy biz basqasha, keńirek oılaýymyz kerek, óıtkeni qaýip-qater kóbeıip, keńeıip jatyr, — dep túsindirdi tilshilerge Gýmanıtarlyq kómek jáne daǵdarysqa qarsy basqarý jónindegi komıssar Hadja Lahbıb. 

Eýrokomıssııa tóraǵasynyń orynbasary Roksana Mynzatý abyroı bolǵanda blokty nólden bastaýdyń qajeti joq ekenin qosty.

— COVID pandemııasy Eýropalyq Odaq aıasynda birlesken is-qımyl, yntymaqtastyq jáne úılestirýdiń absolıýtti mańyzdy ekenin kórsetti. Bizdiń jumysymyzdy tıimdirek etetin, bizdi kúsheıtetin osy, — dedi ol.

Strategııanyń negizgi baǵyttarynyń biri — turǵyndardyń daıyndyǵyn arttyrý. Komıssııa blok memleketterin azamattarda oqshaýlanǵan jaǵdaıda 72 saǵatqa jedel járdem jıyntyǵy men azyq-túlik bar bolǵanyn qadaǵalaýyn qamtamasyz etýge shaqyrady.

EO-ǵa múshe keıbir elder usynystar ázirlep qoıǵan. Mysaly, Frantsııa mundaı aman qalý jınaǵyna azyq-túlik, sý, dári-dármek, portatıvti radıo, sham, batareıalar, zarıadtaǵyshtar, qolma-qol aqsha, medıtsınalyq retseptiler, qosalqy kiltter, jyly kıim jáne pyshaq, mańyzdy qujattardyń kóshirmeleri bolýyn talap etedi.

Buǵan deıin EO-nyń syrtqy ister jónindegi joǵarǵy ókili 28 naýryzda Qazaqstanǵa keletinin jazǵan bolatynbyz.