Brıýsseldegi jarylys: Jaralanǵandar sany 300-ge jetti, onyń 61-i aýyr jaǵdaıda
ASTANA. QazAqparat - Brıýsseldegi lańkestik saldarynan 31 adam qaza taýyp, 300-ge jýyǵy jaralanǵan. Onyń 150-i aýrýhanada jatyr, dep habarlady «TASS» agenttigi Belgııa Densaýlyq saqtaý mınıstrligine silteme jasaı otyryp.
«Sońǵy málimetter boıynsha, 31 adam qaza taýyp, 300 adam jaralanǵan, 150 adam áli de aýrýhanada, sonyń ishinde 61 adamnyń jaǵdaıy óte aýyr», delingen habarlamada.
Buǵan deıin BAQ-ta 32 adam qaza tapty degen aqparat taraǵan bolatyn.
Sonymen qatar, seısenbi kúni Brıýsselde bolǵan jarylysta qaza tapqandardyń birqatarynyń aty-jóni anyqtaldy. Qazirgi ýaqytta el astanasyndaǵy áskerı gospıtalde máıitterdi taný, anyqtaý protsessi júrip jatyr.
