Brıýsseldegi jarylys: Sodyrlar mingen taksı júrgizýshisi taǵy eki bombany tabýǵa kómektesti
ASTANA. QazAqparat - Polıtsııa lańkesterdi áýejaıǵa jetkizip salǵan taksı júrgizýshisi bergen aqparattyń arqasynda Brıýssel áýejaıy men Brıýsseldiń Skarbek kommýnasyndaǵy páterden jarylǵysh zatty anyqtaı aldy, dep habarlaıdy Derniere Heure basylymy.
Taksı júrgizýshisi quqyq qorǵaý organdaryna lańkestik oqıǵa bolǵan soń birneshe saǵat ótkennen keıin ózi habarlasqan, dep jazady RIA Novostı.
Ol polıtsııaǵa jolaýshylary baqylaý kamerasy túsirip alǵandaı úsh emes, odan da kóp sómkeni jetkizgenin aıtqan. Basylymnyń málimetterinshe, onyń bergen bul túsiniktemeleri tártip saqshylaryna Brıýssel áýejaıynan jarylmaı qalǵan úshinshi bombany tabýǵa kómektesti.
Budan basqa, taksı júrgizýshisi klıentterin alyp ketken Skarbek kommýnasyndaǵy úıdiń mekenjaıyn aıtty. Ol polıtseılerge jolaýshylarynyń ózderimen birge odan da kóp sómkeni alyp ketkisi kelgenin, biraq óziniń olardyń bul isine kelispegenin, sebebi kólikte bos oryn bolmaǵanyn aıtty. Bul mekenjaı boıynsha tintý júrgizilip, Belgııanyń federaldyq prokýratýrasy shegege toltyrylǵan jarylǵysh zat, sondaı-aq hımııalyq zat jáne «Islam memleketi» lańkestik uıymynyń týyn tapty.
