Brıýsseldegi «Birlik marshyna» 15 myńnan astam adam qatysty (FOTO)
BRıÝSSELЬ. QazAqparat - Brıýssel ortalyǵynda lańkestik áreket qurbandaryn eske alýǵa arnalǵan «Birlik marshy» ótip jatyr.
Belgııa astanasyndaǵy sherýge 15 myńnan astam adam qatysty. Olar «Men- Sharlı» (Je Suis Charlie) degen sóz jazylǵan plakattardy kóterip shyqty.
Sherýge qatysqan halyq negizinen únsiz júrip otyrdy. Tek oqtyn-oqtynda «Marseleza» áni shyrqaldy.
«Bul aktsııa - frantsýz jýrnalısterine degen qurmettiń belgisi. Biz eshqashan baspasóz bostandyǵynan jáne árkimniń óz kózqarasyn bildirýinen bas tartpaımyz»,- dedi sherýge qatysýshy «Bostandyq » (Libirtes) plakatyn kótergen Danıel esimdi azamat.
Brıýsseldegi bul aktsııa Parıjdegi sherýmen bir ýaqytta bastaldy. Lańkestik áreketterden qaza tapqandardy eske alýǵa arnalǵan m undaı sharalar Eýropanyń kóptegen iri qalalarynda ótti.
