Brıýsselde jańajyldyq ot shashýlar ótkizilmeıtin boldy
ASTANA. QazAqparat - Brıýssel meri terrorlyq akt qaýpine baılanysty dástúrli jańajyldyq ot shashýlar ótkizýge tyıym saldy.
«Biz ishki ister mınıstrimen birge beısenbi keshkisin merekelik sharalardy ótkizýden bas tartý jóninde sheshim qabyldadyq», - dep málimdedi belgııalyq astananyń meri Ivan Maıor RTBF telearnasynyń tikeleı efırinen.
Seısenbi kúni belgııalyq prokýratýra Brıýsselge shabýyl jasaýdy josparlaǵan eki kúdiktiniń ustalǵanyn habarlaǵan bolatyn. Polıtseılik reıdter júrgizý barysynda olardan elektrondy materıaldar, arnaıy kıimder jáne «Islam memleketi» ekstremıstik toptarynyń úgit-nasıhat materıaldary tárkilenip alynǵan.
Al budan buryn, dálirek aıtqanda, 24 jeltoqsanda polıtsııa qyzmetkerleri qarasha aıynda Parıjde jarylys uıymdastyrǵan toptyń toǵyzynshy múshesin tutqyndaǵan edi.
Federaldyq prokýratýra qyzmetkerleriniń aıtýynsha, tutqyndaý sharasy budan sál buryn qoldanylǵanymen, onyń sybaılastaryn shoshytpaý úshin bul týraly eshqandaı habar taratylmaǵan. Qazirgi ýaqytta polıtsııa qyzmetkerleri basty kúdikti - Salah Abdesalamdy izdestirýde.
Parıjde 13 qarashada bolǵan lańkestik jarylystan soń Brıýsselde birqatar kópshilik is-sharalar ótkizýge tyıym salyna bastady. Al kóshelerde áskerıler patrýldik kúzet uıymdastyrdy. Sondyqtan, bıyl Brıýssel jańa jyl merekesin jyldaǵydaı úlken aýqymda toılamaıtyn boldy.
Foto: © AFP 2015/ Emmanuel Dunand
