Brıýsselde «Malbek» metro stansasy qaıta ashyldy
ASTANA. QazAqparat - Brıýsselde bolǵan teraktiden keıin «Malbek» metro stansasy jolaýshylar úshin qaıta ashyldy, dep habarlady www.24.kz.
Qazir qalalyq metronyń barlyq júıesi túgel jumys istep tur. Biraq beketterdegi qaýipsizdik sharalary burynǵyǵa qaraǵanda barynsha kúsheıtilgen. Jolaýshylardyń júkteri qatań tekserilip, kireberiste sarbazdar kezekshilik etip tur.
Aıta keteıik, Brıýssel metrosy men áýejaıdaǵy jarylystar 22 naýryzda bolǵan edi. Lańkestik áreketterden 30-dan astam adam qaza taýyp, júzdegeni jaraqat aldy.
«Árıne, stansaǵa aıtarlyqtaı zaqym keldi, biraq qatty qıraǵan joq. Sondyqtan jóndeý jumystary shaǵyndap qana júrgizildi. Áli biraz jumys bar, biraq ol metro qozǵalysyna kedergi keltirmeıdi», - deıdi Brıýssel metrosynyń baspasóz hatshysy An Van Hamme.
