Brıýsselde lańkestik qaýpiniń joǵary deńgeıi bir aptaǵa uzartyldy
BRıÝSSELЬ. QazAqparat - Belgııa bıligi lańkestik qaýiptiń joǵary deńgeıin kem degende kelesi dúısenbige deıin saqtaıdy. Bul týraly eldiń premer-mınıstri Sharl Mıshel dúısenbi kúngi keshte aıtty.
«Terrorıstik qaýip deńgeıin «4» kórsetkishinde saqtap qalý sheshimin qabyldadyq. Bul asa úlken qaýipti bildiredi. Eldiń qalǵan aýmaǵynda qaýiptilik deńgeıi «3», - dedi úkimet basshysy.
Brıýsselde mektepter, ýnıversıtetter men metro sársenbige deıin jabyq bolady.
«Birtindep ómirdiń qalypty jaǵdaıyna oralǵymyz keledi. Brıýsselde mektepter men metro sársenbi kúni ashylady», - dedi eldiń premer-mınıstri.
El bıligi elorda turǵyndaryna saparǵa, adamdar kóp shoǵyrlanǵan jerlerge shyqpaýdy, bıliktiń, polıtsııa men arnaıy qyzmetterdiń nusqaýyn ustanýǵa keńes berdi.
Osyǵan deıin premer-mınıstr kúsh qurylymdary lańkestik oqıǵalardyń qaıtalanýy jónindegi aqparatqa ıe ekenin aıtty.
Jeksenbiden dúısenbige qaraǵan túni polıtsııa Brıýsselde jáne onyń mańynda 19 reıd júrgizdi. Terrorızmge qarsy shara barysynda 16 adam ustaldy, alaıda Parıjde shabýyl jasaýǵa negizgi kúdikti Salah Abdeslam qolǵa túspedi.
Eske sala keteıik, qaýipterdi saraptaý boıynsha belgııalyq úılestirý ortalyǵy (OCAM) ótken senbi kúni Brıýsseldegi lańkestik qaýiptiń deńgeıin eń joǵaryǵy - tórtinshi sanatqa deıin kóterý týraly sheshim qabyldady. Eldiń qalǵan aýmaǵynda bul kórsetkish úshinshi deńgeıde.
