Brıýsselde Qazaqstan men EO qarym-qatynasy talqyǵa túsedi
NUR-SULTAN. QazAqparat - Brıýsselde «Qazaqstannyń jańa basshylyǵy: Qazaqstan men Eýropalyq Odaq arasyndaǵy qarym-qatynastyń damýyna yqpaly qandaı bolmaq?» taqyrybynda dóńgelek ústel ótedi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«13 qarashada Brıýsselde Euractiv medıa agenttiginiń alańynda QR Syrtqy ister mınıstriniń orynbasary Roman Vasılenkonyń qatysýymen «Qazaqstannyń jańa basshylyǵy: Qazaqstan men Eýropalyq Odaq arasyndaǵy qarym-qatynastyń damýyna yqpaly qandaı bolmaq?» taqyrybynda dóńgelek ústel ótedi», - dedi resmı ókil búgingi brıfıng barysynda.
Onyń atap ótýinshe, is-sharaǵa negizgi spıkerler retinde Eýropalyq parlament, Eýropalyq komıssııa, Eýropalyq syrtqy is-qımyl qyzmeti men oı-talqy ortalyqtarynyń ókilderi qatysady. Kún tártibinde Prezıdent Qasym-Jomart Toqaevtyń Qazaqstan halqyna Joldaýy, Qazaqstan men Eýropalyq Odaq arasyndaǵy Keńeıtilgen áriptestik pen yntymaqtastyq týraly kelisim kúshine engennen keıin ekijaqty yntymaqtastyqty damytý máseleleri bar.
