Brıýsselde qazaq memleketiniń kóne kartalarynyń kórmesi ashyldy
Іs-shara Qazaqstan men EO arasyndaǵy dıplomatııalyq qarym-qatynastyń 30 jyldyǵyn merekeleý aıasynda Eýroparlamenttiń Ortalyq Azııa elderimen baılanys jónindegi delegatsııasynyń múshesi, Eýroparlament depýtaty Andrıs Amerıkstiń qoldaýymen uıymdastyryldy.
Eýropa astanasynda XVI-XIX ǵasyrlarda jasalǵan jáne bastapqyda qazirgi Belgııa, Nıderlandy, Frantsııa, Germanııa, Ulybrıtanııa aýmaǵynda basylǵan kartalar usynyldy.
Osyndaı 1,5 myńǵa jýyq kartany qazaqstandyq ǵalym, L.N.Gýmılev atyndaǵy Eýrazııa ulttyq ýnıversıtetindegi qazirgi zamanǵy zertteýler ınstıtýtynyń dırektory Muhıt-Ardager Sydyqnazarov jınaǵan jáne olar onyń Brıýsselde baslyp shyqqan «Qazaqstannyń tarıh tolqynyndaǵy úzdiksiz memlekettiligi: XVI–XIX ǵasyrlardaǵy Eýropa jáne Amerıka kartalaryndaǵy qazaq memleketi» atty kitabynda jarııalanǵan. Kórmeniń ashylýyna zertteý avtorynyń ózi de qatysty.
M.Sydyqnazarovtyń kitabyn shyǵarý orny osy dáýirdegi belgııalyq kartograftardyń Ortalyq Azııa jáne álemniń basqa aımaqtary týraly geografııalyq aqparatty Eýropada taratýdaǵy erekshe róline baılanysty tańdaldy.
QR Belgııadaǵy elshisi Marǵulan Baımuhanov Qazaqstan elshiligi bul bastamany qoldaıtynyn, óıtkeni ol búgingi tańda Táýelsiz Qazaqstan men EO arasyndaǵy berik áriptestiktiń tarıhı negizderin kórsetetin mańyzdy zertteýge negizdelgenin atap ótti.
«Bul zertteý búginde Qazaqstan men Eýropalyq Odaq arasynda damyp kele jatqan yntymaqtastyq pen seriktestik qatynastarynyń mańyzdy tarıhı negizin ashady», - dedi qazaqstandyq dıplomat.
Kórmege alǵashqy kelýshiler, onyń ishinde eýropalyq jáne belgııalyq parlamentterdiń depýtattary men qyzmetkerleri, jalpy eýropalyq ınstıtýttardyń, dıplomatııalyq korpýstyń, ǵylymı-zertteý ortalyqtary men qoǵamdyq uıymdardyń ókilderi kórmeniń Eýropa halyqtary men qazaqtar arasyndaǵy alǵashqy baılanystardy kórsetetin qundy tarıhı málimetter men materıaldardyń odan ári taralýyna yqpal etetin mańyzdy oqıǵa ekenin atap ótti.
Kórmeniń ashylý saltanatyna Eýroparlament depýtattary, Eýropalyq komıssııa, Eýropalyq syrtqy is-qımyl qyzmeti, dıplomatııalyq korpýs músheleri, jýrnalıster, sarapshylar jáne basqa da qonaqtar qatysty.
Eýroparlament depýtaty Karsten Lýkke QazAqparat tilshisine mádenıet pen tarıhty bilý Eýroodaq pen Qazaqstan azamattaryna búgingi tańda durys saıasat qurýǵa kómektesetinin aıtty.
«Bir-birimiz týraly, ásirese jastarymyz týraly bilimimizdi únemi tereńdetip otyrý mańyzdy. Eýropalyqtar úshin Qazaqstan men Ortalyq Azııanyń ashylýy, sondaı-aq Eýropadaǵy Ortalyq Azııa men Qazaqstandy buryn qalaı qabyldaǵanymyzdyń tarıhy qyzyqty. Men Qazaqstan men EO-ny dıplomatııalyq qatynastardyń 30 jyldyǵymen quttyqtaımyn jáne elderimizdiń odan ári tabysty damýyn tileımin», - dedi kórmeniń ashylýynda Eýropalyq parlament múshesi K.Lýkke.
Ekspozıtsııa Eýroparlament músheleri men kelýshileri úshin Brıýsseldegi basty ǵımaratynda aptanyń sońyna deıin ashyq.
