Brıýsselde Eýroodaqtyń barlyq elderi ekonomıkalyq reformalar boıynsha kelisimge kele almady
BRıÝSSELЬ. 9 jeltoqsan. QazAqparat /Dımash Syzdyqov/ - Eýroodaqtyń memleketteri men úkimetteriniń basshylary qaryz daǵdarysyn eńserý úshin qajetti reformalar júrgizý máselesi boıynsha mámilege kele almady, ekonomıkalyq saıasat pen fıskaldyq tártipti úılestirýdi kúsheıtý jónindegi úkimetaralyq kelisim qurý jóninde ǵana ýaǵdalasty.
Bul týraly EO Keńesiniń tóraǵasy Herman Van Rompeı Brıýsseldegi túni boıy jalǵasqan birinshi kúngi otyrystyń qorytynlary boıynsha málim etti.
«Eýroaımaqtyń on jeti eli, sondaı-aq basqa alty memleket úkimetaralyq kelisim jasasady», - dedi H.Rompeı.
Budan buryn sammıtte Germanııa men Frantsııanyń EO normatıvtik-quqyqtyq aktilerine bıýdjettik qarajattardy jumsaýǵa jáne memlekettik qaryz kólemine baqylaýdy kúsheıtetin eleýli ózgerister engizý týraly usynystary qabyldanady nemese eýroaımaqtyń 17 memleketi men osy odaqqa qosylatyn elder arasynda jańa shart jasalady dep paıymdalǵan bolatyn. Alaıda buǵan birqatar elder, sonyń ishinde Ulybrıtanııa, Polsha, Shvetsııa, Rýmynııa jáne basqalary qarsy boldy.
Degenmen EO Keńesiniń tóraǵasy H.Rompeı Lıssabon shartyna ózgerister engizýden buryn úkimetaralyq kelisim shapshańyraq jasalar degen úmitin úzbeıdi.
Búgin Brıýsselde EO sammıti odan ári jalǵasady, onda Horvatııany Eýroodaqqa qosý týraly shartqa resmı qol qoıylmaq, bul el 2013 jyldyń shildesinen bastap birtutas eýropalyq qurylymnyń tolyq quqyly múshesi bolmaq. Budan keıin memleketter basshylary qaryzdyq daǵdarys máselelerin sheshý máselelerin talqylaýǵa qaıtadan kirisedi.
