Brıýsselde EO elderi Astana memlekettik qyzmet habynyń jumys tájirıbesin talqylady
Onyń jumysyna Qazaqstannyń, Qyrǵyzstannyń ókiletti organdary, Belgııa úkimeti, Eýrokomıssııa, BUU, Qazaqstannyń jáne EO múshe elder dıplomatııalyq mıssııa ókilderi, Astana memlekettik qyzmet habynyń delegatsııasy qatysty.
Brıýsseldegi BUU Damý baǵdarlamasy ókildiginiń dırektory Barbara Peske-Monteıro óz sózinde Astana haby tuǵyrnamasy memlekettik qyzmet salasynda tájirıbe almasyp, yntymaqtastyqty ynǵaıtý úshin «ǵajaıyp múmkindik» ekenin aıtty. Ol ásirese jańa tehnologııalardyń damýy men tsıfrlandyrý kezeńinde osyndaı biriktirýshi tuǵyrnama aıryqsha mańyzdy ekenin tilge tıek etti. Óıtkeni, «san qyrly memlekettik qyzmet júıesi ártúrli quraldardy qajet etedi, al irgeli jumys isteý tásilderi – árkimde ártúrli», - dedi Peske-Monteıro.
Astana memlekettik qyzmet habynyń basqarýshy komıtet tóraǵasy Alıhan Baımenov qazirgi tańda Hab kópjaqty jahandyq tuǵyrnama retinde 42 qatysýshy el men 55 ınstıtýtsıonaldy uıymdy jumyldyratynyn jetkizdi.
Belgııa Koroldigindegi Qazaqstan elshiliginiń Keńesshi-Ýákili Erbolat Sembaev óz sózinde «memlekettik basqarý sapasy kóp jaǵdaıda kadrlerdi daıyndaý sapasymen anyqtalatynyn» aıtty. Osy kontekste Qazaqstan men BUU Damý baǵdarlamasynyń keń aýqymdy jobasy – Astana memlekettik qyzmet haby jumysy óte ózekti ekenin atap ótti. Keńesshi-Ýákil óz sózinde 15 naýryzda 25 memleket pen 5 halyqaralyq uıym Astana habyn qurý týraly Dekalaratsııa qabyldaǵanyna 7 jyl tolatynyn habarlady.
Talqylaý barysynda Eýrokomıssııa men biraqatar memleket ókilderi aımaqtyq yntymaqtastyq turǵysynda Astana haby jumysyn uıymdastyrý formalary men tásilderin zerdeleýge yqylas tanytty. Jıynǵa qatysqan ártúrli el qatysýshylary Hab jumysyna joǵary baǵa bere otyryp, ári qaraı yntymaqtastyqty damytýǵa qyzyǵýshylyq bildirdi.
Sonymen birge qatysýshylar memlekettik basqarý salasyndaǵy ozyq eýropalyq tájirıbeni zertteý men qoldaný barysy boıynsha pikir almasty. Oǵan qosa Habtyń memlekettik qyzmet salasynda áleýetti nyǵaıtý, zertteýler jasaý, bilim men tájirıbe almasý boıynsha jumystary men jańa saraptamalary qatysýshylar nazaryna usynyldy.
Taraptar EO elderiniń ozyq tájirıbesin taratýda jáne aımaq elderinde tıimdi memlekettik qyzmet júıelerin ilgeriletý boıynsha áriptestikti keńeıtý joldaryn qarastyrdy. Eýropa Odaǵy - Astana memqyzmet haby quryltaıshylarynyń biri. Qazirgi tańda Eýropa Odaǵyna múshe 11 memleket - Astana habyna qatysýshy el.
Bul sharany Brıýsseldegi BUU DB ókildigi Qazaqstannyń Belgııa Koroldigindegi elshilik qoldaýymen ótkizdi.
