Brıýsselde 1 sáýirdegi festıvalge jınalǵandardy polıtsııa sýatqysh qoldanyp taratty
BRıÝSSELЬ. QazAqparat – Beısenbi keshke Brıýssel polıtsııasy Býa-de-la-Kambr saıabaǵyndaǵy aktsııaǵa jınalǵandardy kúshpen taratty, dep habarlaıdy QazAqparattyń menshikti tilshisi.
Qazirgi kezde Belgııanyń joǵary oqý oryndarynyń stýdentteri kóktemgi demalysta. Sol sebepti jastar saıabaq men alańdarǵa barady. Óıtkeni, qalada kafe, restoran jáne qoǵamdyq-mádenı oryndar jabyq.
Áleýmettik jelide «1 sáýir kúni «La Boom» festıvalin ótkiziletini jóninde habar taralǵan. Nátıjesinde belgııalyqtar arasynda tanymal Býa-de-la-Kambr saıabaǵyna 1 500-nan 2 000-ǵa deıin adam jınalǵan, olardyń basym bóligi – jastar.
Brıýssel meri Fılıpp Kloýz Týıtterde adamdardyń «taza aýa jutqysy» keletinin túsinetinin jazdy, alaıda, dárigerler pandemııamen kúresip jatqan jergilikti aýrýhanalardaǵy aýyr jaǵdaıǵa qarap, bıliktiń bundaı jıyndardy quptamaıtynyn jetkizdi.
Keshki saǵat 18:00-de polıtsııa jınalǵandardy taratýǵa kiristi. Narazylyq bildirgender jaǵynan da, polıtsııa jaǵynan da birneshe adam jaraqat aldy. Atty polıtsııa baq arasyndaǵy adamdardy qýyp shyǵyp, saǵat 21:00-de tártip ornady.
Eske sala keteıik, Belgııada keshki saǵat 22-den tańǵy 6-ǵa deıin komendat saǵat jarııalanǵan.
Avtory Arnur Raqymbekov
