Brıýssel áýejaıy áýe keńistiginde dron baıqalǵannan keıin ýaqytsha jabyldy

ASTANA. KAZINFORM – Seısenbi keshke Eýropa astanasyndaǵy Zaventem áýejaıy onyń áýe keńistiginde dron baıqalǵany týraly habardan keıin ýaqytsha jabyldy, dep habarlaıdy Kazinform agenttiginiń menshikti tilshisi. 

Dron shamamen saǵat 20:00–ge jýyq anyqtalyp, sonyń saldarynan barlyq ushý men qoný reısi ýaqytsha toqtatylǵan.

— Qaýipsizdik maqsatynda qazirgi ýaqytta barlyq áýe qatynasy toqtatyldy, — dedi áýekompanııa ókili.

Barlyq keletin reıster Lej qalasyna baǵyttalǵan.

Keıinirek áýejaı ókilderi habarlaǵandaı, áýe keńistigi qaıta ashylyp, reıster qalpyna keltirildi. Bul týraly jergilikti BAQ habarlady.

Bul oqıǵa Eýropanyń túrli bólikterinde drondardyń baıqalýyna baılanysty qaýipsizdikke alańdaýshylyq týdyrǵan sońǵy jaǵdaılardyń biri. Ótken juma kúni Berlın-Brandenbýrg áýejaıy da dron qaýpine baılanysty reısterin toqtatýǵa májbúr bolǵan.

Brıýssel áýejaıy ústinen dron baıqalǵany alǵash ret tirkelip otyr. Alaıda osy aıdyń basynda Belgııadaǵy birneshe áskerı baza ústinen kúmándi drondar kóringen. Eldiń qorǵanys mınıstri Teo Frankenniń aıtýynsha, bul drondar «jaýyngerlik ushaqtar men oq-dári qoımalaryna tyńshylyq jasaýǵa árekettengen bolýy múmkin». 

Aıta ketelik Brıýsselde alǵash ret Eýroodaq pen Mysyr sammıti ótti.