Brıýssel 613 kúnnen keıin úkimet qurdy

ASTANA. KAZINFORM – Belgııanyń Brıýssel astanalyq aımaǵynda uzaqqa sozylǵan saıası daǵdarystan keıin jańa úkimet quryldy, dep habarlaıdy Kazinform menshikti tilshisi. 

Belgııanyń jeti partııasy — MR (lıberaldar), PS (sotsıalıster), Les Engagés (tsentrıstter), Groen (jasyldar), Anders (flamand lıberaldary), Vooruit (flamand sotsıalısteri) jáne CD&V (hrıstıan demokrattary) koalıtsııalyq kelisimge keldi.

2024 jyldyń maýsym aıyndaǵy aımaqtyq saılaýdan keıin birden bastalyp, 20 aıdan astam (613 kún) ýaqyt júrgizilgen kelissózden soń ony júrgizýshiler 10-13 aqpan aralyǵynda University Foundation ǵımaratynda qarqyndy «konklav» ótkizdi. 

Brıýssel astanalyq aımaǵynyń jańa úkimetin endi Uccle (Ýkkel) kommýnasynyń burynǵy meri, frankofon-lıberal Borıs Dıllıes (Boris Dilliès) basqarady. 

Belgııa premer-mınıstri Bart de Vever (N-VA) bul jetistikti quptap, onyń búkil eldiń jáne Eýropalyq Odaq astanasynyń bedelin saqtaıtynyn atap ótti.

Osy arada Vever jańa koalıtsııanyń Brıýsseldiń qarjysyn túzetý qabiletine «sál kúmánmen qaraıtynyn» atap ótti. 

- Premer-mınıstr retinde kózqarasym boıynsha Brıýsseldiń tapshylyǵy úlken bıýdjetin qaıta qurylymdaýǵa múddelimin. Eger jańa úkimet muny júzege asyrsa, men qýanamyn, - dedi ol.

Aıta ketý kerek, Brıýsseldiń aımaqtyq bıýdjeti jylyna shamamen 8 mlrd eýrony quraıdy, biraq 2025 jyldyń sońyndaǵy tapshylyq 1-1,6 mlrd eýrodan asty. Bul qurylymdyq teńgerimsizdikke ákeldi: áleýmettik qyzmetter, kólik, qaýipsizdik jáne kóshi-qonǵa jumsalatyn shyǵyndar artty, al kirister reformalardyń bolmaýyna baılanysty azaıyp keledi. Aqyry shamamen 15 mlrd eýro kóleminde úlken qaryz jınaldy, bul shaǵyn EO aımaǵy úshin mańyzdy.

Osyǵan deıin Eýroodaqta satylmaǵan kıimdi joıýǵa tyıym salynatynyn jazdyq.