Reseıdegi gımnazııada atysqa býllıng sebep bolýy múmkin

Brıansk gımnazııasynda oq jaýdyrǵan 8 synyp oqýshysy buǵan deıin synyptastary tarapynan qysym kórýi múmkin. Tergeý buny qylmystyń negizgi sebepteriniń biri retinde qarastyryp otyr, dep habarlaıdy Kazinform agenttiginiń menshikti tilshisi.

RF Tergeý komıtetiniń habarlaýynsha, beısenbi kúni 8 «A» synybynyń oqýshysy mektepke bytyraly myltyq ákelip, synyptastaryna oq jaýdyrǵan.

Belgili bolǵandaı, 14 jastaǵy Alına synybyna bıologııa sabaǵy bastalǵanda, saǵat 09:01-de kirdi. Ol bes synyptasyn jaraqattap úlgerdi. Kýágerlerdiń aıtýynsha, áýeli tórt-bes atystyń úni estilip, sodan keıin oqýshylardy mektepten shyǵara bastady, taǵy bir bóligi ǵımarat ishinde jasyryndy.

«Oqýshylardyń biri gımnazııa ǵımaratyna qarý ákelip, odan birneshe ret oq atty, saldarynan bes adam zardap shekti. Odan keıin boıjetken ózin-ózi óltirdi. Jaraqat alǵan synyptas qyzdardyń biri de qaıtys boldy. Oqıǵanyń mán-jaıy anyqtalýda», - delingen ІІM Brıansk oblysy boıynsha basqarmasy taratqan málimdemede.

Tergeý organdary RF Qylmystyq kodeksi 105-babynyń 2-bólimi boıynsha is qozǵady.
Parallel synyp oqýshylarynyń aıtýynsha, oqýshy qyz synyptastarynyń, kóbine uldar tarapynan býllıngke ushyraǵan. Tergeý nusqasy boıynsha, onyń qylmysqa barýynyń negizgi sebebi osy bolýy múmkin.

Ol tegis oqpandy «Bekas-3» myltyǵyn qaǵazǵa arnalǵan týbýsqa salyp ákelgen. Mektepte metall izdegish qural ornatylmaǵan. Budan basqa, ol aıaq kıimine ańshylyq pyshaq jasyryp ákelgen. Qarý resmı túrde ákesiniń atyna tirkelgen, er adam jaýap alý úshin bólimshege jetkizildi.

RF Densaýlyq saqtaý mınıstriniń kómekshisi Alekseı Kýznetsovtiń BAQ-qa habarlaýynsha, jalpy bes adam jaraqat alyp, eki adam mert boldy. Jaraq alǵandardyń biri jansaqtaý bóliminde jatyr.

Brıansk oblysynyń prokýratýrasy atysqa baılanysty qarýdyń aınalymy men saqtalýyna qatysty zańnamany tekserýdi uıymdastyrdy.

Tekserý barysynda jaýapty qyzmetkerler men qoldanylǵan qarý ıesiniń áreketi baǵalanady.
Brıansk mektepterinde oqýshylar men muǵalimder úshin qaýipsiz jaǵdaı qalaı qamtamasyz etiletini, onyń ishinde qaýipsizdikti uıymdastyrý jáne mektepke kirgizý erejelerin qalaı saqtalatyny tekseriledi.

Eske sala ketsek, búgin Reseıdiń Brıansk qalasynda 8 synyp oqýshysy qarýdan oq jaýdyrdy.