Brýschatka, shyny ydys, kólik bamperi – qaıta óńdelgen qaldyqtardan qandaı ónim alynady

ASTANA. KAZINFORM – Úkimet qaldyqtardy basqarý jobalaryn qarjylandyrýdyń jeńildetilgen tetigin bekitti. Nátıjesinde 232,2 mlrd teńge somaǵa 94 joba irikteldi. Bul týraly QR Ekologııa jáne tabıǵı resýrstar mınıstri Erlan Nysanbaev aıtyp berdi.

Prezıdent Qasym-Jomart Toqaev ınvestorlardy tartyp, iri qalalarda turmystyq qatty qaldyqtardy qaıta óńdeý zaýyttaryn salý tapsyrmasyn bergen edi. 

Mınıstrdiń aıtýynsha, turmystyq qatty qaldyqtardy qaıta óńdep, daıyn ónim alýdy damytý sapaly qaıtalama shıkizatty talap etedi. Ol úshin qaıta óńdeýge deıingi barlyq tehnologııalyq operatsııalardy, ıaǵnı jınaý, tasymaldaý jáne suryptaýdy retke keltirý qajet. 

«Úkimet qaldyqtardy basqarý salasyndaǵy jobalardy qarjylandyrýdyń jeńildetilgen tetigin bekitti, ol – qoqys tasıtyn kólikterdi satyp alýǵa, suryptaý jelilerin jáne qaıta óńdeý qýattaryn salýǵa baǵyttalǵan. Qarjylandyrý Ónerkásipti damytý qory arqyly 3 jyldan 15 jylǵa deıingi qaryz berý merzimin jáne 3% syıaqy mólsherlemesin qarastyrady. Úsh jylǵa shamamen 200 mlrd teńge qarajat bólinedi», - dedi E. Nysanbaev Úkimettiń búgingi otyrysynda. 

Mınıstrliktiń janynan qurylǵan jobalyq top barlyq ákimdiktermen jáne salalyq bıznes ókilderimen keńester men kezdesýler ótkizgen.

«Jobalardy qaraý kezinde óńirlerdegi kommýnaldyq qaldyqtar jaǵdaıyn taldaýǵa jáne problemalardy júıeli sheshý turǵysynan jobalardyń tıimdiligine kóńil bólingen. Nátıjesinde 232,2 mlrd teńge somaǵa 94 joba irikteldi. Jobalardy júzege asyrý nátıjesinde brýschatka, lıýkter, qoqys baktary, shyny ydystar, streıch plenkalar, kólik bamperleri sııaqty halyqtyń basqa da tutyný taýarlary shyǵarylady», - dedi Ekologııa mınıstri. 

Aıta keteıik, Qazaqstanda turmystyq qaldyqtyń 1 mln tonnasy ǵana qaıta óńdeledi.