Brýtsellezge qarsy rusat etilgen vaktsınalar tizimin qaıdan tabýǵa bolady
NUR-SULTAN. QazAqparat – Premer-Mınıstrdiń orynbasary Roman Sklıar Májilis ókilderiniń depýtattyq saýalyna bergen jaýabynda brýtsellezge qarsy vaktsınaǵa qoıylatyn jańa talaptardy atady, dep habarlaıdy QazAqparat tilshisi.
Vıtse-Premerdiń aıtýynsha, Eýrazııalyq ekonomıkalyq komıssııa keńesiniń sheshimi boıynsha 2021 jyldan bastap halyqaralyq GMP standarty Qazaqstandaǵy barlyq bıopreparat óndirýshiler úshin mindetti bolyp tabylady.
«Aýyl sharýashylyǵy janýarlaryna veterınarııalyq qaǵıdalardy bekitý týraly» Aýyl sharýashylyǵy mınıstriniń 2015 jylǵy 29 maýsymdaǵy № 7-1/587 buıryǵynyń 1088-tarmaǵyna sáıkes Qazaqstan Respýblıkasynyń aýmaǵynda brýtsellezge qarsy vaktsınalaýǵa jol beriledi. Brýtsellezge qarsy vaktsına Qazaqstanda nemese Eýrazııalyq ekonomıkalyq odaqqa múshe memleketterde tirkelgen bolýy jáne www.oie.int saıtynda jarııalanǵan, Dúnıejúzilik janýarlar saýlyǵy uıymy usynǵan tizimde bolýy tıis», - dep jazylǵan jaýapta.
Mal ıesi ekpe salý úshin brýtsellezge qarsy vaktsınany ózi tańdaı alady. Biraq ol tańdaǵan ekpe joǵaryda atalǵan talaptarǵa saı bolýy mindetti.
«Janýar ıesi jergilikti atqarýshy organnyń veterınarııalyq dárigerine ekpe júrgizetinin 7 kún buryn habarlaýy kerek. Sondaı-aq tańdalǵan vaktsınanyń túri jáne ony qoldaný ádisi týraly málimet beredi», - delingen Roman Sklıardyń jaýabynda.
Premer-Mınıstrdiń orynbasary óz jaýabynda AÓK Damytýdyń 2022-2026 jyldarǵa arnalǵan ulttyq jobasy sheńberinde janýarlardyń asa qaýipti aýrýlaryna qarsy kúres jónindegi strategııaǵa halyqaralyq talaptarǵa sáıkes ózgerister men tolyqtyrýlar engizý josparda bar ekenin málim etti.
