«Birtutas tárbıe» baǵdarlamasy jańa formatta jalǵasady – Erlan Qalmaqov
ASTANA. KAZINFORM – Memleket basshysynyń bıyl Ulttyq quryltaıda bergen tapsyrmalaryn oryndaý maqsatynda burynǵy «Birtutas tárbıe» baǵdarlamasy jańa ataý men mazmunǵa ıe boldy. Endi ol «Adal azamat» birtutas tárbıe baǵdarlamasy retinde júzege asyrylady.
Bul týraly QR Oqý-aǵartý mınıstrligi Tárbıe jumysy jáne qosymsha bilim berý departamentiniń dırektory Erlan Qalmaqov Ortalyq kommýnıkatsııalar qyzmetinde ótken brıfıngide baıandady.
– Baǵdarlama 2023 jyly pılottyq rejımde bastalyp, 2024 jyly barlyq bilim berý uıymdaryna tolyq engizildi. Qazirgi tańda elimiz boıynsha 11 myńnan astam balabaqsha, 8 myńnan asa mektep jáne 700-den astam kolledj bul baǵdarlamany iske asyrýda, - dedi Erlan Qalmaqov.
Onyń aıtýynsha, 2025 jyldan bastap baǵdarlama jańa ataýmen jalǵasyp, birneshe mańyzdy jańashyldyqtar engizilgen.
Baǵdarlamadaǵy basty ózgerister:
Birinshi. Memleket basshysynyń tapsyrmasyna sáıkes, Baǵdarlama menshik túrine qaramastan, barlyq bilim berý uıymdaryna taratylyp jatyr. ıAǵnı, jeke menshik mektepter de «Adal azamat» baǵdarlamasy boıynsha tárbıe jumysyn ótkizedi. Bul mektepterdiń tárbıe jónindegi mamandary men pedagogteri úshin arnaıy kýrstar ótkizildi.
Ekinshiden, ata-analar komıtetteriniń qyzmetin transformatsııalaýy bastaldy. Bul rette, ata-analar komıtetteri mekteptiń, ustazdardyń senimdi seriktesi retinde tárbıe jumysyna belsendi aralasyp, urpaq tárbıesine qatysty jaýapkershilikti bólisetin bolady. Osy rette Ata-analardy pedagogıkalyq qoldaý ortalyqtarynyń jumysy odan ári jandandyrylyp, mektep – bala – ata-ana úshtiginiń yntymaǵyn nyǵaıtýǵa erekshe nazar aýdarylady.
Úshinshiden, múddeli memlekettik organdardyń oqýshylardyń tárbıesine qatysty bastamalary baǵdarlamaǵa kiriktirildi. 14 ortalyq memlekettik organmen birlesken jospar ázirlendi. Bul qadam tárbıe jumysyn birizdendirýge, ári tıimdiligin arttyrýǵa septigin tıgizedi. Quqyq qorǵaý organdary, medıtsına uıymdary mamandarymen birlesken sharalar júıeli uıymdastyrylyp jatyr.
Tórtinshiden, Baǵdarlama mazmunyna sáıkes biryńǵaı dızaın kod ázirlendi. Arnaıy brendbýkqa sáıkes mekteptiń ishki bezendirilýi qolǵa alyndy. Bul bilim ortasyn úshinshi ustaz retinde qoldanýǵa múmkindik beredi.
– «Adal azamat» baǵdarlamasy elimizdiń jas urpaǵyn jaýapty, otansúıgish jáne adal azamat etip tárbıeleýge baǵyttalǵan. Bul tárbıe júıesi qoǵamnyń barlyq múshelerin – mektepti, ata-anany, memlekettik qurylymdardy – ortaq maqsatqa biriktiredi, - dedi Erlan Qalmaqov.
Buǵan deıin Oqý-aǵartý mınıstrligine jańa fýnktsııalar júktelgenin jazǵanbyz.