Birtutas Parlamentke bastar jol: «Parlamentarızm jarshysy» jýrnaly tanystyryldy
ASTANA. KAZINFORM — Eldegi konstıtýtsııalyq reformalar men saıası jańǵyrý jaǵdaıynda zań shyǵarý qyzmetiniń sapasyn arttyratyn «Parlamentarızm jarshysy» atty jańa ǵylymı-taldamalyq jýrnaldyń tusaýy kesildi.
Sonymen qatar tusaýkeser barysynda jýrnaldyń jańa tsıfrlyq platformasy tanystyryldy. Zamanaýı syn-qaterler men tsıfrlandyrý úrdisine saı qurylǵan basylym ashyq ǵylymı dıalog ornatýǵa jáne parlamenttik qaýymdastyq pen akademııalyq orta arasyndaǵy baılanysty nyǵaıtpaq.
Bul bastama Qazaqstannyń zań shyǵarý júıesiniń jańa deńgeıge ótýi men bolashaqtaǵy Quryltaı formatyndaǵy jumysqa daıyndyq aıasynda erekshe mańyzǵa ıe bolyp otyr.
Basylymnyń mazmuny men tehnıkalyq baǵyty týraly Parlamentarızm ınstıtýty dırektorynyń orynbasary Berik Bekjanov keńinen toqtalyp ótti.
— Eń bastysy, «Parlamentarızm jarshysy» — taza ǵylymı basylym. Onyń betterinde parlamentarızm mektebin damytýǵa arnalǵan irgeli zertteýler jarııalanady. Bul — ǵalymdardyń ózara pikir almasýyna, Parlamentte qaralyp jatqan zań jobalaryndaǵy naqty normalardy talqylaýǵa arnalǵan biregeı alań. Sonymen qatar jýrnalda qylmystyq, qylmystyq-protsestik jáne azamattyq-protsestik zańnama tóńiregindegi qordalanǵan máselelerdiń ǵylymı sheshimderi usynylyp, praktık mamandardyń jumysyna taldaý jasalady. Basylym tek otandyq sarapshylarmen shektelmeıdi, sheteldik ǵalymdardyń da óz oıyn ortaǵa salýyna tolyq múmkindik bar. Osy maqsatta jýrnal qazaq, orys jáne aǵylshyn tilderinde jaryq kóredi, — deıdi ol.
Jýrnal tek ǵylymı zertteýler jınaǵy emes, sonymen qatar zań shyǵarýshy bılik úshin mańyzdy kásibı qural retinde qarastyrylyp otyr. Májilis depýtaty Natalıa Dementevanyń pikirinshe, bul basylym Qazaqstan parlamentarızminiń ótken tájirıbesi men bolashaq nysanasyn jalǵaıtyn altyn kópir bolmaq. Ásirese birpalataly Parlamentke ótý kezeńinde mundaı sarapshy taldaýynyń orny bólek.
— Biz qazir birpalataly Parlamentke kóshý sııaqty mańyzdy belestiń aldynda turǵandyqtan, zańnama burynǵydan da naqty, durys jáne saralanǵan tásilderdi talap etedi. Sondyqtan «Parlamentarızm jarshysy» — zańgerler men depýtattar úshin taptyrmas ǵylymı qural, — dep atap ótti depýtat.
Aıta keteıik, 15 mamyrda Parlament palatalarynyń birlesken otyrysy ótedi.
