BRT jelisi jolǵa ketetin ýaqyttyń 40 paıyzyn únemdeıdi - Baýyrjan Baıbek
ALMATY. QazAqparat - Almaty ákimi qalada júrgizilip jatqan kólik reformasy týraly egjeı-tegjeıli aıtyp berdi, dep habarlaıdy QazAqparat tilshisi.
«Qaladaǵy mobıldilik - megapolısterdegi ómir sapasynyń basty krıterıi. Bul oqý, bilim úshin asa mańyzdy. Byltyr qoǵamdyq kólik salasynda shaǵym óte kóp bolatyn. Búginde shaǵymdardyń sany kúrt azaıdy», - dedi ákim halyqpen kezdesýde.
Onyń aıtýynsha, BRT jobasynyń iske qosylýy jolǵa ketetin ýaqyttyń 40%-yn únemdeýge múmkindik berdi. Kún saıyn BRT jelisimen 100 myń jolaýshy júredi.
«Adamdar qoǵamdyq kólikke beker otyrmaıdy. Taldaý kórsetkendeı, Tımırıazev kóshesiniń boıynda avtobýstardyń jyldamdyǵy avtokólikke qaraǵanda 3 ese artqan», - dedi ol.
Sonymen qatar, qalada jeńil relsti kólikti iske qosý boıynsha baıqaýdyń birinshi kezeńi aıaqtalǵan. Bıyl qalada LRT jelileri salynady.
«Metronyń eki stansasynyń qurylysy bastaldy. Bul kúndelikti jolaýshylar aǵymyn 86 myńǵa arttyrmaq. Qosymsha taǵy 8 stansa vagon satyp alady», - dedi ákim.
Sonymen qatar, ákim jolaýshylar tasymalynyń sapasyn kótermegen tasymaldaýshylarmen kelisimshart buzylatynyn aıtty.
«Biz qazir qatań shara qabyldap jatyrmyz. Tasymaldaýshylardan 560 mln teńge sýbsıdııa ustalyp qaldy. «Avtobaza Dostrans» JShS, «Tegıs-Trans» JShS, «SANT» JShS, «Nurjas Trans» JShS, «Taksomotor parki» JShS sekildi kompanııalarmen kelisimshart buzyldy. Eger tasymaldaýshylar sapany jaqsartýǵa den qoımasa, olar qoǵamdyq kólik salasynda jumys istemeıtin bolady. Ol úshin aýqymdy qarjy bólinip jatyr. Soǵan saı sapa bolýy kerek», - dedi ol.
