BRT: Endi almatylyqtar jolǵa ketetin ýaqytty esepteı alady
ALMATY. QazAqparat - Almatyda jyldam avtobýs qatynasy (BRT) jelisindegi jolaýshylar legi 40 paıyzǵa artty, dep habarlaıdy QazAqparat tilshisi qalalyq Transport holdınginiń baspasóz qyzmetine silteme jasap.
«Mustafın, Súleımenov, Jandosov, Tımırıazev kóshelerin jalǵap turǵan BRT jelisi iske qosylǵannan beri jolaýshylardy tasymaldaý kólemi 40 paıyzǵa artqan. Jaqyn arada bul kórsetkish eselense, adamdar, ásirese júrgizýshiler barar jerine taksı nemese óz kólikterinen góri qoǵamdyq kólikpen jetý yńǵaılyraq ekenin túsine bastaıdy»,- dedi Transport holdıngindegiler.
BRT jelisiniń uzyndyǵy 8 shaqyrymǵa sozylyp jatyr. Bul qashyqtyqty qoǵamdyq kólik jarty saǵatta eńseredi. Buryn jolaýshylar qarbalas ýaqyt kezinde jolǵa bir jarym saǵat joǵaltatyn.
«Sońǵy derekter boıynsha, BRT-niń birinshi kezeńi iske qosylǵan 10 kún ishinde jolashylar qatary 140 myńǵa jetken. Bir jyl buryn bul san 100 myńnan áreń asqan bolatyn. Jáne bul kórsetkish Jeltoqsan kóshesine deıin ǵana sozylyp jatqan BRT jelisiniń birinshi kezeńine jasalǵan esep. Kelesi bólikti iske qossa, BRT-men qatynaýshylar sany kóbeımek»,-dedi Almaty Transport holdınginiń dırektory Sadır Hamraev.
Endi qoǵamdyq kólik belgilengen jolymen ǵana júrip, sol jaqqa burylys jasaıtyn kólikter onyń jyldamdyǵyna kedergi keltirmeıtin bolady.
«Bul, birinshiden, qoǵamdyq kólikterdi keste boıynsha júrýge úıretedi. Ekinshiden, jolaýshylar BRT aıaldamasyna kelgen bette jolǵa ketetin ýaqytyn esepteı alady»,-dedi holdıng basshysy.
Jyl sońyna qaraı qala ákimdigi qosymsha BRT jelisin jasaıdy. Ol «Orbıta» yqsham aýdanynan shyǵyp, Tımırıazev-Jeltoqsan kósheleriniń qıylysyna deıin boılaıdy. Bul baǵytpen 18 metrlik uzyn avtobýstar júretin bolady.
