BRT: Almatynyń Jeltoqsan kóshesimen eki baǵytta jańa avtobýs baǵyttary júredi
ALMATY. KAZINFORM – Almatynyń Jeltoqsan kóshesinde avtobýstarǵa arnalǵan BRT jelisi iske qosylady.
Tımırıazev kóshesiniń qoldanystaǵy arnaıy jolaǵy Jeltoqsan kóshesimen jalǵanady. Kazinform agenttigi jańa BRT qurylysy jáne onymen júretin qoǵamdyq kólikter týraly jaýapty vedomstvodan naqtylady.
Qazir Almaty ortalyǵyndaǵy Jeltoqsan men Naýryzbaı batyr kóshelerinde bir baǵytta ǵana qozǵalys bar. Naýryzbaı batyr kóshesinde kólik aǵyny, sonyń ishinde arnaıy jolaqpen júretin qoǵamdyq kólik tek ońtústik baǵytta qozǵalady, al Jeltoqsan kóshesinde — kerisinshe, tek soltústikke qaraı júredi.
Alaıda buryn Jeltoqsan kóshesinde negizgi kólik aǵymy ońtústikten soltústikke baǵyttalsa, al eń shetki jolaq qoǵamdyq kólikke bólinip, ol qarsy baǵytta qozǵalǵan.
Bıyl júzege asyrylyp jatqan Jeltoqsan kóshesindegi BRT jobasy dál osy erejeni qaıta engizedi.
Almaty qalasy jol ınfraqurylymyn damytý basqarmasynyń málimetinshe, qurylys-montajdaý jumystary jaqyn arada tolyq aıaqtalady.
— Bul joba memlekettik saraptamadan ótti jáne barlyq múddeli qyzmettermen kelisilgen. Jobany tolyq aıaqtaý 2025 jyldyń qarasha aıyna josparlanǵan, — dep habarlady basqarmadan.
Vedomstvo málimetinshe, Jeltoqsan kóshesinde eki baǵytty qozǵalys resmı ashylǵannan keıin keıbir avtobýs marshrýttarynyń qozǵalys syzbasy ózgeredi. Qazir bul kóshede ońtústikten soltústikke qaraı № 92, № 32, № 205 (jartylaı), № 99 jáne № 119 marshrýttary júredi. Al keri baǵytta dál osy avtobýstar Naýryzbaı batyr kóshesimen ótedi.
— Jeltoqsan kóshesinde № 92, № 98 jáne № 205 baǵyttaryn iske qosý josparlanyp otyr. Marshrýttar Raıymbek dańǵylyndaǵy qurylys jumystary aıaqtalǵan soń ashylady. Alaıda Jeltoqsan kóshesinde trolleıbýs marshrýttaryn iske qosý kózdelmegen, — delingen jaýapta.
Eske salaıyq, sáýir aıynda Jeltoqsan kóshesi boıymen BRT jelisiniń qurylysy bastaldy.
Buǵan deıin Raıymbek batyr dańǵyly men Jeltoqsan kóshesinde BRT qansha paıyzǵa daıyn ekenin jazǵanbyz.
