Bronıslav Komorovskıı Polsha Prezıdenti boldy
ASTANA. Shildeniń 7-si. QazAqparat - Polshadaǵy Prezıdent saılaýynda Seım spıkeri, memleket basshysynyń mindetin atqarýshy Bronıslav Komorovskıı jeńiske jetti. Respýblıkanyń Memlekettik saılaý komıssııasy osyndaı resmı qorytyndyny jarııa etti, dep habarlaıdy ITAR-TASS.
Ortalyq saılaý komıssııasynyń aqparatyna sáıkes, 100 paıyz bıýlletenniń 53,01%-i Komorovskııdi qoldaǵan. Onyń qarsylasy «Zań jáne ádilet» partııasynyń jetekshisi ıAroslav Kachınskıı saılaýshynyń 46,99 paıyz daýysyn jınady. Saılaýǵa halyqtyń 55,31 paıyzy qatysty.
Prezıdent mindetin atqarýshynyń jeńisi, endi Komorovskıı mindetine búgin kirisedi degen sóz emes. Konstıtýtsııaǵa sáıkes, jeńimpaz Seım marshaly, ıaǵnı bul joly ózi shaqyrǵan Ulttyq jınalys aldynda ant berýi tıis. Ádette bul shara óziniń aldyndaǵy prezıdenttiń ókilettigi bitken kúni oryndalady. Sarapshylardyń pikirine qaraǵanda, burynǵy prezıdent Leha Kachınskııdiń opat bolýyna baılanysty bul shara jyldam ótýi tıis.
Memlekettik saılaý komıssııasy saılaý qorytyndysyn resmı jarııa etken soń, qorytyndy 30 kún ishinde Joǵarǵy sotta bekitilýi tıis. Osy kezeńde saılaý zańdylyqtarynyń buzylǵany baıqalatyn bolsa, onda sot osy oqıǵanyń aq-qarasyn tekserýdi qolǵa alady. Sarapshylardyń sózine qaraǵanda, saılaý aldyndaǵy tynyshtyqty buzǵany, basqa da zań tártipteriniń buzylýyna jol bergeni úshin saılaý ýchaskeleri merziminen buryn jabylady.
Saılaý ótti dep jarııalanǵan soń, Joǵarǵy sot jedel túrde parlamentke tıisti qarar jiberedi. Seım spıkeri nemese onyń orynbasarlarynyń biri 7 kún ishinde Ulttyq Jınalysty shaqyrýdyń merzimin bekitýi tıis. Osylaı bolǵannyń ózinde, Komorovskıı tamyz aıynyń alǵashqy on kúndigi ishinde óz mindetine tolyq kirise alady.
