Bronhıt aýrýy qandaı asqynýlarǵa ákelýi múmkin
Bronhıt - bronhtyń qabynýynan týyndaǵan tynys alý organdarynyń aýrýy. Bronhıt kezindegi qabyný protsesi bronhtyń shyryshty qabyǵyna nemese onyń qabyrǵasynyń qalyńdyǵyna áser etýi múmkin. Bul týraly Almaty qalalyq №36 emhananyń dárigeri Nazym Shójeeva aıtty, dep habarlaıdy Kazinform.
Dárigerdiń aıtýynsha, jiti bronhıt jótelmen, keýdedegi aýyrsynýmen jáne entigýmen sıpattalady. Bronhıt aýrýy kóbinese ózdigimen ótse de, durys emdelmegen jaǵdaıda belgili bir asqynýlar týyndaýy múmkin.
"Mysaly, jiti bronhıt bronhopnevmonııa túrindegi asqynýdy týdyrýy múmkin. Bul ókpege áser etetin ınfektsııalyq jáne qabyný protsesi, qyzba, qurǵaq jótel jáne jalpy álsizdikti týdyrady. Sozylmaly aýrýdyń baqylaýsyz ósýi turaqty jiti pnevmonııaǵa ákeledi jáne aqyrynda ókpeniń obstrýktıvti aýrýyna aınalady. Bul kezde arna tarylyp, tynys alý joldarynyń shyryshty qabaty isinedi, ókpe tinderi ishinara joıylady. Aýrýdyń asqynýyna jol bermeý kerek.
Bronhıaldy zaqymdanýdyń alǵashqy belgileri bolýy múmkin jótel, qyzba, álsizdik paıda bolǵan kezde-aq dárigerge kóriný kerek. Dáriger dıagnoz qoıyp, emdelý joldaryn aıtady», - deıdi dáriger.
Sozylmaly bronhıt ókpe gıpertenzııasy, emfızema, bronhoektazdyq aýrý, pnevmonııa, tótenshe jaǵdaıda júrek jetkiliksizdigi men basqa da qaýipti aýrýlardyń damýyn týdyrýy múmkin.
"Eger joǵaryda atalǵan asqynýlar paıda bolǵan jaǵdaıda, erterek medıtsınalyq kómekke júginý qajet. Ýaqytyly emdeý arqyly asqynýlardyń damýyn aıtarlyqtaı tómendetýge bolady", - dep atap ótti Nazym Shójeeva.
