Bıylǵy alty aıda eldegi qylmys deńgeıi 11%-ǵa tómendedi – Bas prokýror

Bul týraly QR Bas prokýrory Berik Asylov óziniń H áleýmettik jelisindegi paraqshasynda jazdy.

-Búginde jasalǵan qylmysqa den qoıý jetkiliksiz. Bizdiń ortaq mindetimiz - qaýip-qaterdiń aldyn alý, quqyq buzýshylyqtardyń sebepterin joıý jáne azamattardyń quqyqtaryn naqty qorǵaýdy qamtamasyz etý. Dál osy maqsatta biz Qylmystyq qaterler men qoǵamdyq qaýipsizdik táýekelderin boljaý ortalyǵyn qurdyq. Ol - qylmystyń saldarymen kúresýden ony erte kezeńde eskertýge kóshýdiń negizgi quraldarynyń biri,-dep jazdy Bas prokýror.

Onyń aıtýynsha, ortalyq táýlik boıy krımınogendik ahýaldy taldaıdy, yqtımal qaýipter men osal aımaqtardy anyqtaıdy, táýekelderdi boljaıdy jáne olardyń aldyn alý boıynsha naqty sharalar ázirleıdi. Jumystyń jeke baǵyty - qylmystyq qaterlerdiń jańa túrleri men tásilderin anyqtaý maqsatynda sheteldik kontentke monıtorıng júrgizý. Eń bastysy - bul taldaý jergilikti jerlerde naqty sheshimder qabyldaýǵa negiz bolady. Máselen, Іshki ister mınıstrligi jáne óńir ákimdikterimen birlesip, jasandy ıntellekt pen ushqyshsyz tehnologııalardy qoldaný arqyly azamattarǵa qylmystyq qol suǵý yqtımaldyǵy joǵary 360-tan astam qaýipti lokatsııa anyqtaldy. Bul jerlerde polıtsııanyń patrýldeýi kúsheıtilip, 4 myńǵa jýyq jańa jaryqtandyrý núktesi jáne 3,5 myńnan astam beınebaqylaý kamerasy ornatyldy. Mundaı tásil óz nátıjesin berip otyr.

Birinshi jartyjyldyqtyń qorytyndysy boıynsha eldegi qylmys deńgeıi 11%-ǵa tómendedi. Adam óltirý, qaraqshylyq, tonaý, qorqytyp alýshylyq, urlyq jáne kóshelerde jasalatyn qylmystar azaıdy. Esirtki qylmysyna qarsy júıeli ári belsendi jumys jalǵasýda. «Kıbernadzor» júıesi esirtkini nasıhattaý belgileri bar 10 myń materıaldy, onyń ishinde 6 myńnan astam esirtki dúkenin buǵattady. Prokýratýra men polıtsııa organdarynyń tıimdi ózara is-qımyly nátıjesinde 464 myńnan astam dropperlik shot buǵattalyp, 2,6 mlrd teńgeden astam esirtkiden túsken kiriske tyıym salyndy.

Sońǵy jyldary alǵash ret ınternet-alaıaqtyqtyń ósý úrdisin ózgertýge qol jetkizildi - olardyń sany 9%-ǵa tómendedi. Quqyq qorǵaý organdary men «Qazaqtelekom» AQ-nyń birlesken kúsh-jigerimen mıllıonnan astam kúdikti qońyraý toqtatylyp, shetelde ornalasqan 12 alaıaqtyq koll-ortalyqtyń qyzmeti áshkerelendi. Máselen, elordada prokýratýranyń bastamasymen osy baılanys operatorynyń bazasynda qurylǵan Antıkoll-ortalyq alaıaqtardyń qońyraýyn 76 jastaǵy áıel olarǵa 21 mln teńge berýge daıyndalyp jatqan sátte toqtatty. Nátıjesinde qarajatty saqtap qalýǵa múmkindik týdy. Sonymen qatar Ulttyq Banktiń Antıfrod-ortalyǵy arqyly 2,9 mlrd teńgeden astam somaǵa alaıaqtyq tranzaktsııalar buǵattaldy.

-Osy sandardyń artynda naqty nátıje - azamattardyń qorǵalǵan ómiri, densaýlyǵy men múlki tur. Bizdiń maqsatymyz - qaýiptiń qylmysqa aınalýyn kútpeı, ony aldyn ala anyqtaý, sebepterin joıý jáne saldarynyń aldyn alý. Konstıtýtsııalyq «Zań men tártip» qaǵıdatyn is júzinde júzege asyrý degenimiz - osy. Memleket basshysy Qasym-Jomart Toqaev aldymyzǵa dál osyndaı mindet qoıyp otyr,-dedi Berik Asylov.

Osyǵan deıin prokýratýranyń balalardyń quqyqtaryn qorǵaýǵa arnalǵan «Sanaly urpaq» tsıfrlyq jobasyn iske qosqanyn habarladyq.