Birinshi jarty jyldyqta óńdeý ónerkásibi 9,8%-ǵa ósti
ASTANA. KAZINFORM – Osy jyldyń birinshi jarty jyldyǵynda óńdeý ónerkásibiniń ósimi 9,8 paıyzdy quraǵan. Bul týraly Úkimet otyrysynda QR Ónerkásip jáne qurylys mınıstri Ersaıyn Naǵaspaev málimdedi.
– Óndiris kólemi mashına jasaý, hımııa ónerkásibi, qurylys materıaldary, rezeńke jáne plastmassa buıymdary óndirisi, jeńil ónerkásip jáne basqa da salalarda artty. Bul ósim negizinen jańadan iske qosylǵan óndiris oryndarynyń esebinen qamtamasyz etildi, – dedi mınıstr.
Ersaıyn Naǵaspaevtyń aıtýynsha, mashına jasaý salasy birinshi jartyjyldyqta 23,1 paıyzǵa ósken.
– Bul salada kólik quraldaryn, aýyl sharýashylyǵy jáne temirjol tehnıkasyn, sondaı-aq turmystyq tehnıkany óndirý kólemi artty. Ósim ishki suranystyń artýy men ınvestıtsııalyq jobalardy iske asyrý esebinen qamtamasyz etildi, – dedi ol.
Sonymen qatar jeńil ónerkásipte óndiris kólemi 94,8 paıyzǵa ósken. Ásirese, toqyma buıymdary, kıim jáne bylǵary ónimderin óndirý qarqyny artqan.
Mınıstrdiń aıtýynsha, hımııa ónerkásibinde de 20,7 paıyz ósim tirkelgen. Atap aıtqanda, kúkirt qyshqyly, ammofos, kaýstıkalyq soda, ammıak selıtrasy jáne sary fosfor óndirisi ulǵaıypty.
Al qurylys materıaldary óndirisi 14,1 paıyzǵa jetken.
- Sondaı-aq qurylys salasynda birinshi jarty jyldyqtyń qorytyndysy boıynsha, jumys kólemi shamamen 4,1 trıllıon teńgeni qurap, ótken jylmen salystyrǵanda 15,2 paıyzǵa artty, - dedi mınıstr.
Osylaısha, qurylys salasynda oń dınamıka saqtalyp otyr. Al eń joǵary ósim Ulytaý, Qyzylorda jáne Pavlodar oblystarynda baıqalǵan.
Aıta keteıik, búgin Úkimet respýblıkalyq bıýdjettiń atqarylý barysyna nazar aýdarady.
