Birinshi synypqa qabyldaý OQU platformasynda iske qosyldy
ASTANA. KAZINFORM – Bıyl elimizde 380 myń bala birinshi synypqa qabyldanady. Al birinshi synypqa qabyldaý alǵash ret Biryńǵaı OQU platformasy aıasynda kezeń-kezeńimen iske qosyldy. Bul týraly QR Oqý-aǵartý birinshi vıtse-mınıstri Shynar Aqparova málim etti.
Ortalyq kommýnıkatsııalar qyzmetinde ótken baspasóz máslıhatynda ol jańa oqý jylyna daıyndyq barysy men oqýshylar sanyna toqtaldy.
– Qazir elimizdegi 8 myńnan astam mektepte 4,1 mln oqýshy bilim alyp jatyr. Bıyl 380 myń bala birinshi synypqa qabyldanady. 11-synypqa 227 myń oqýshy kóshti. Ótken oqý jylynda 230 myńnan astam oqýshy mektep bitirdi, – dedi Shynar Aqparova.
Onyń aıtýynsha, 1-synypqa qabyldaý alǵash ret QazTech platformasynda Biryńǵaı OQU platformasy aıasynda kezeń-kezeńimen iske qosyldy.
Jańa oqý jylynda bastaýysh synyptardaǵy baǵalaý tásilderi de jańartylady. Bólim boıynsha jıyntyq baǵalaý (BJB) men toqsan boıynsha jıyntyq baǵalaý (TJB) alynyp tastalyp, kúndelikti qalyptastyrýshy baǵalaýdyń róli kúsheıtiledi.
– Dıktant, mazmundama, shyǵarma, joba, aýyzsha jáne praktıkalyq jumys sekildi baǵalaý ádisterin muǵalim ózi tańdap, aralyq baqylaý retinde qoldanady, – dedi birinshi vıtse-mınıstr.
Sonymen qatar úlgilik oqý josparlarynyń qurylymy ońtaılandyryldy. Oqýshylardyń barlyq oqý pánin tolyq oqýyna múmkindik berý úshin qysqartylǵan úlgilik oqý josparlary alynyp tastaldy.
Aıta keteıik, buǵan deıin Oqý-aǵartý mınıstri Qazaqstannyń 12 jyldyq bilim berý júıesine kóshý máselesine qatysty pikir bildirgen edi.
