Birinshi synypqa qabyldaý: ata-analar neni bilýi kerek
ASTANA. KAZINFORM — Elimizdegi barlyq memlekettik mektepte, onyń ishinde «Keleshek mektepterinde» de 1-synypqa qujat qabyldaý jalǵasyp jatyr.
Oqý-aǵartý mınıstrliginiń habarlaýynsha, ótinishti OQU ulttyq bilim berý platformasy (oqu.edu.kz), eGov elektrondyq úkimet portaly arqyly nemese bilim berý uıymyna tikeleı baryp, qaǵaz túrinde berýge bolady.
«Keleshek mektepterine» qabyldaý kezinde mekteptiń qyzmet kórsetý aýmaǵynda turatyn balalar basym quqyqqa ıe. Sonymen qatar bos oryn bolǵan jaǵdaıda ata-analar (zańdy ókilder) kez kelgen memlekettik bilim berý uıymyna ótinish bere alady.
Ótinish berý úshin zańdy ókildiń turǵylyqty jeri boıynsha turaqty tirkeýi bolýy qajet. Turǵylyqty mekenjaı memlekettik aqparattyq júıeler arqyly rastalady.
1-synypqa qabyldaý úshin qajet qujattar:
- balanyń 3×4 kólemindegi fotosýreti;
- profılaktıkalyq egý kartasy (№ 065/e nysany);
- balanyń densaýlyq pasporty (№ 052-2/e nysany);
- psıhologııalyq-medıtsınalyq-pedagogıkalyq konsýltatsııanyń (PMPK) qorytyndysy (erekshe bilim berý qajettilikteri bar balalar úshin).
Mektepaldy daıarlyqtan (0-synyp) ótken bilim alýshylar ata-analarynyń (zańdy ókilderiniń) ótinishi negizinde 1-synypqa qabyldanady.
Qabyldaý merzimderi óńirler boıynsha:
27 mamyr — 31 tamyz:
Astana qalasy, Abaı, Jetisý, Qyzylorda jáne Batys Qazaqstan oblystary.
10 maýsym — 31 tamyz:
Almaty qalasy, Aqmola, Aqtóbe, Jambyl jáne Shyǵys Qazaqstan oblystary.
18 maýsym — 31 tamyz:
Shymkent qalasy, Almaty, Qostanaı, Pavlodar jáne Atyraý oblystary.
29 maýsym — 31 tamyz:
Túrkistan, Mańǵystaý, Qaraǵandy, Soltústik Qazaqstan jáne Ulytaý oblystary.
Aıta keteıik, qujat qabyldaý óńirlerde ártúrli kúnderi bastalǵanymen, barlyq óńirde 2026 jylǵy 31 tamyzǵa deıin jalǵasady.
Eske salaıyq, buǵan deıin balabaqshaǵa qabyldaý úshin qandaı qujattar qajet ekenin jazǵanbyz.
