Birinshi Olımpıadalyq kıbersport oıyndary 2027 jyly ótedi

ASTANA. KAZINFORM — Іrikteý jarystary bıyl bastalady.

— 2027 jyly Saýd Arabııasynyń Er-Rııad qalasynda kıbersport álemi úshin de, Olımpıadalyq qozǵalys úshin de mańyzdy oqıǵa bolatyn tuńǵysh Olımpıadalyq kıbersport oıyndary ótedi, — delingen Halyqaralyq Olımpıada komıteti (HOK) saıtyndaǵy aqparatta. 

Olımpıadalyq kıbersport oıyndaryn uıymdastyrý úshin HOK Saýd Arabııasynyń Olımpıada jáne Paralımpıada komıtetimen yntymaqtasady. 

— Endi bizde kıbersport boıynsha alǵashqy Olımpıadalyq oıyndardyń naqty jol kartasy bar, — dedi HOK prezıdenti Tomas Bah.

Olımpıadalyq kıbersport oıyndaryn qurý týraly sheshim ótken jyldyń shildesinde HOK-tyń 142-sessııasynda qabyldanǵan. Sol kezde alǵashqy oıyndar 2025 jyly ótedi dep habarlanǵan bolatyn.

Eske salsaq, buǵan deıin Almatyda kıbersporttan ALMA CUP 2024 týrnıri ótkenin habarladyq.