Birinshi lıgada «Jaıyq» klýby qatarynan úshinshi oıyndy jeńispen túıindedi
ASTANA. KAZINFORM — Fýtboldan birinshi lıga komandalary arasynda Qazaqstan chempıonatynyń 9-týrynda Oraldyń «Jaıyǵy» Semeıde jergilikti «Elim-aı jastarymen» alańǵa shyqty.
Match taǵdyryn birinshi taım sońynda «Jaıyqtyń» oıynshysy Temirlan Úmbetov soqqan jalǵyz gol sheshti.
Osylaısha, Vıacheslav Nevolnıkovtiń shákirtteri qatarynan úshinshi básekede jeńiske jetti. Budan buryn 22 mamyrda «Jaıyq» Aqtaýda «Kaspıı jastaryn» 1:0 esebimen utqan edi. Sodan keıin Oralda óz alańynda 27 mamyrda asa tartysty oıynda «Aqtóbe jastaryn» 3:2 esebimen tize búktirdi.
Qazirgi kezde «Jaıyq» komandasy 15 upaımen týrnır kestesinde jetinshi orynda tur.
Osy týrda premer-lıgaǵa shyǵýǵa úmitkerlerdiń biri – «Taraz» klýby kútpegen jerden óz alańynda «Astana jastaryna» ese jiberdi – 1:2. Aqtóbelik jastar óz alańynda «Akademııa Ońtústikten» iri eseppen jeńilip qaldy – 1:4.
Eske sala keteıik, budan buryn «Jaıyq» fýtbol klýbynyń jańa maýsymdaǵy ekinshi jeńisine qol jetkizgenin jazǵan edik.
