Birinshi lıgada «Aqjaıyq» «Astana Jas» komandasyn oısyrata jeńdi
Birinshi lıga komandalary arasynda fýtboldan el chempıonatynyń 24-týrynda elordada «Astana Jas» komandasy Oraldyń «Aqjaıyǵyn» qabyldady, dep habarlaıdy QazAqparat tilshisi.
Kezdesý qonaqtardyń aıqyn basymdylyǵymen ótti.
Match barysynda ýkraınalyq legıoner Mıkola Agapov pen Oral fýtbolynyń túlegi Bekzat Imanǵazıev qos-qostan gol soqsa, taǵy bir dopty Baqdáýlet Kóńilimqos qarsylas komandanyń qaqpasyna engizdi.
Osylaısha, «Aqjaıyq» 5:0 esebimen jeńiske jetti. Oraldyqtar 42 upaımen burynǵysha tórtinshi orynda keledi.
Bul týrda Semeıdiń «Elimaıy» «Hantáńiri» komandasyn 2:1 esebimen tize búktirip, upaı sanyn 62-ge jetkizip, jekedara kósh bastaýda. Túrkistannyń «Turany» 53 upaımen ekinshi satyda tur.
«Aqjaıyq» kelesi týrda 27 qyrkúıekte óz alańynda «Jas Qyrandy» qabyldaıdy.
