Birinshi lıga: «Turan» men «Taraz» fýtbol komandalary týrnır kestesindegi ornyn jaqsartty
ASTANA. KAZINFORM – Búgin fýtboldan Birinshi lıganyń ІІІ týry jalǵasyn tapty. Ekinshi oıyn kúnindegi eki kezdesýdiń nátıjesi belgili boldy.
Bul týrdaǵy oıyndardyń birinde Túrkistannyń «Turany» syrt alańda Qostanaıdyń «Tobyl-2» klýbymen kim myqtyny anyqtady.
Túrkistandyq komanda birinshi kezeńde qatarynan eki gol soqsa, oǵan alań ıeleri bir golmen jaýap qaıyrdy. Ekinshi taımda qarsylastar taǵy bir-bir goldan soqty. Osylaısha «Turan» qarsylasynan 3:2 esebimen basym tústi. Nátıjesinde týrnır kestesinde 6 upaımen túrkistandyqtar 5-orynǵa jaıǵassa, «Tobyl-2» nebári 1 upaımen 13-orynda tur.
Taǵy bir kezdesýde «Taraz» óz alańynda Semeıdiń «Elimaı-2» klýbyn 3:0 esebimen jeńdi. Alań ıeleri birinshi kezeńde qatarynan úsh gol soqty. Bul jeńisten keıin «Taraz» 6 upaımen 3-orynǵa taban tirese, «Elimaı-2» 2 upaımen 12-orynda keledi.
Dál qazir «Han táńiri» (Almaty) men «Jaıyq» (Oral) arasyndaǵy kezdesý ótip jatyr.
Aıta ketsek, 23 sáýirde elordalyq «Astana-J» Shymkenttiń «Akademııa Ońtústigin», Pavlodar oblysynyń «Batyry» aqtaýlyq «Kaspıı-J» komandasyn 1:0 tize búktirdi. Sondaı-aq almatylyq «Qaırat-J» «Aqtóbe-J» klýbyn 6:0 esebimen jeńse, dál sondaı eseppen Túrkistan oblysynyń «Arysy» óz alańynda qaraǵandylyq «Shahterge» ese jiberdi.
Byltyr Birinshi lıgada alǵashqy úsh orynǵa ıe bolǵan «Kaspıı» (Aqtaý), «Ertis» (Pavlodar), «Altaı» (Óskemen) komandalary Premer-lıgaǵa tikeleı joldama aldy. Al Premer-lıgada sońǵy oryndy mise tutqan «Turan» bıyl Birinshi lıgada synǵa túsip qaldy.
