Birinshi lıga: «Kaspıı» Jańaózende «Altaı» komandasynan basym tústi
JAŃAÓZEN. KAZINFORM – «Kaspıı» fýtbol klýby Birinshi lıganyń kezekti týry aıasynda óskemendik «Altaı» komandasymen kezdesip, 4:1 esebimen jeńiske jetti. Aqtaýlyq komanda bul oıyndy Jańaózende birinshi ret ótkizdi.
Qoǵamdyq kommýnıkatsııa ortalyǵynyń habarlaýynsha, 12 sáýir kúni ótken oıynǵa Jańaózen qalasynyń ákimi Janseıit Qaınarbaev arnaıy qatysty. Ol óz sózinde, búgingi oıyn qala úshin tarıhı sát bolǵanyn atap ótti.
– Jańaózende ashyq fýtboldan alǵash ret jarys ótip jatyr. Aldymen osy oıynnyń ótýine úlken septigin tıgizgen oblys ákimi Noǵaev Nurlan Asqarulyna alǵysymdy bildiremin. Bul oıyn bizdiń jastarymyzǵa, óskeleń urpaqqa sporttyń jańa baǵytyn kórsetip, serpin beredi degen úmittemin. Fýtbol – halyq arasynda joǵary tanymaldylyqqa ıe bolýda. Sondyqtan, ary qaraı fýtboldy Jańaózen qalasynda damytýdy jalǵastyramyz degen senimdemin, - dedi Janseıit Qaınarbaev.
Oıyn Jańaózen qalasyndaǵy Ámın Tuıaqov atyndaǵy stadıonda ótti. Kezdesýge myńdaǵan jankúıerler qatysyp, jerlesterimizge qoldaý kórsetti. Match qorytyndysy boıynsha «Kaspıı» fýtbol klýby 4:1 esebimen jeńiske jetti.
«Kaspıı» fýtbol klýbynyń basshysy Nurjan Jalǵasbaev jarysqa sportshylardyń daıyndyǵy joǵary deńgeıde bolǵanyn aıtty.
– Birinshi lıga oıyndaryna aqpan aıynan bastap daıyndyqty bastadyq. Bul «Kaspıı» fýtbol klýbynyń jyl basynan beri ótkizip otyrǵan ekinshi oıyny boldy. Alǵashqy oıyn Arys qalasynda ótip, jeńispen oralǵan bolatynbyz. Sol jeńisti nátıjeni búgin taǵy qaıtaladyq, - dedi Nurjan Jalǵasbaev.
Oıyn sońynda eki komandanyń ókilderi baspasóz konferentsııasyna qatysyp, búgingi match týraly pikirlerimen bólisti. Aldaǵy ýaqytta «Kaspıı» fýtbol klýbynyń óz jerimizde bolatyn jarystarynyń barlyǵy Jańaózende ótkiziledi.
– 32 jyldan keıin qalamyzǵa úlken fýtbol qaıta oraldy. Men osyndaı joǵary deńgeıdegi jarysqa alǵash ret kelip turmyn. Maǵan búgingi oıyn unady. Atmosferasy tym bólek. «Kaspıı» fýtbol klýbynyń jankúıerimin. Janymda dostarym boldy. Barlyǵymyz aqtaýlyq komandaǵa senemiz. Fýtbolshylarymyz jaqsy oıyn kórsetip jatyr. Ary qaraı da úlken jeńister kútemiz. Búgingideı jarystar Jańaózende kóbeıse, jankúıer retinde qýanamyz, - dedi jankúıer Ernar Nurlanuly.
Aıta keteıik, qala ákimdigi halyqtyń fýtbolǵa degen zor qyzyǵýshylyǵyn kórip, Jańaózende «Kaspıı» fýtbol ortalyǵy bólimshesiniń ashýǵa qoldaý bildiretinin jetkizdi.
