Birinshi lıga: «Ekibastuz» fýtbol komandasy qatarynan ekinshi márte jeńiske jetti

ASTANA. KAZINFORM – Búgin fýtboldan Qazaqstan Birinshi lıgasynyń 13-týr oıyndary ótti.

«Aqtóbe-2» óz alańynda astanalyq «SD Family» komandasyna 1:3 esebimen ese jiberse, Pavlodar oblysynyń «Ekibastuzy» almatylyq «Han táńirini» 2:0 esebimen tize búktirdi. Bul – ekibastuzdyq komandanyń qatarynan ekinshi jeńisi.

Al almatylyq AKAS óz alańynda «Tarazdan» 3:1 esebimen basym tústi. 

Endi 11 shildede «Jetisaı» (Túrkistan oblysy) men «Akademııa Ońtústik» (Shymkent), «Shahter» (Qaraǵandy) men «Kaspıı» (Aqtaý), «Qaırat-2» (Almaty) men «Túrkistan», «Ertis» (Pavlodar) pen «Altaı» (Óskemen) oınaıdy.

Týrnır kestesinde alǵashqy eki orynǵa ıe bolǵan komandalar aldaǵy jyly Premer-lıgaǵa qatysýǵa tikeleı joldamaǵa qol jetkizedi.

Bıyl «Shahter», «Ertis», «Kaspıı» komandalary úzdikter qatarynda bolady dep boljanyp otyr.

On bir týrdan keıin «Kaspıı», «Ertis», «Shahter», «Altaı» komandalary alǵashqy oryndardy ózara bólisip tur.

Eske salsaq, budan buryn fýtboldan Qazaqstan ulttyq quramasynyń jartylaı qorǵaýshysy Ramazan Orazov Semeıdiń «Elimaı» komandasyna aýysty.