Birinshi kezeńde jeńdim dep bosańsýǵa bolmaıdy — Silk Way Star qatysýshysy Rýhııa Baıdúkenova
ASTANA. KAZINFORM — Qytaıda ótip jatqan Silk Way Star halyqaralyq mýzykalyq jobasynda álemniń 12 elinen ónerpazdar baq synap jatyr. Qazaqstan atynan dodaǵa qatysyp jatqan Rýhııa Baıdúkenova halyqaralyq sahnada ulttyq mýzykany tanystyrýdyń mańyzy, baıqaýǵa án tańdaýy jáne kelesi kezeńge daıyndyǵy týraly aıtty.
— Alǵashqy kezeńderdiń biri bolǵandyqtan, barlyǵymyz bul sahnaǵa birinshi ret shyqtyq. Bir-birimizdi de tolyq bilmeımiz. Upaıymyz afrıkalyq qatysýshymen birdeı boldy. Keıin kórermenderdiń daýys berýi arqyly birinshi orynǵa shyqtym. Túsirilim aıaqtalǵannan keıin ǵana jeńiske jetkenimdi tolyq túsindim. Árıne, qatty qýandym, biraq aldymyzda áli toǵyz kezeń bar. Bir kezeńde jeńiske jettim dep bosańsýǵa bolmaıdy, sondyqtan kelesi kezeńderge daıyndyqty jalǵastyrdym, — dedi ánshi Jibek Joly telearnasynyń «Búgin.LIVE» baǵdarlamasy efırinde.
Rýhııa alǵashqy kezeńge tańdaǵan «Bulbul» ánin qazaq mýzykasynyń eń bıik týyndylarynyń biri dep baǵalap, onyń vokaldyq turǵydan kúrdeli ekenin aıtty.
— «Bulbul» — Latıf Hamıdıdiń áni. Men ony qazaq án ónerindegi eń bıik shyńdardyń birinde turǵan shyǵarmalardyń biri dep esepteımin. Mýzykalyq jaǵynan óte kúrdeli án. Tipti vokaldyq deńgeıi joǵary shyǵarmalardyń arasynan top-3-ke engizer edim. Alǵashqy kezeńde ózimdi jaqsy kórsetýim, barlyq vokaldyq múmkindigimdi kórsetýim kerek boldy. Sol sebepti osy ándi tańdadym, — dedi Rýhııa Baıdúkenova.
Al baıqaýdyń ekinshi kezeńinde Rýhııa el men jer taqyrybyna arnalǵan «Qyran qustaı» ánin oryndaıdy. Bul shyǵarma «Joshy» ansamblimen birge jazylǵan.
Sonymen qatar halyqaralyq sahnada kúrdeli shyǵarmalardy oryndaý úshin ánshi daýysqa erekshe kútim qajet ekenin de aıtty. Ásirese, joǵary notalardy alý úshin daýysqa salmaq túsirmeýge tyrysady.
— Joǵary notany alý jáne ony saqtap turý úshin kóp sóılemeýge, sýyq sýsyn ishpeýge tyrysamyn. Jaqsy uıqy, tynysh kóńil-kúı de mańyzdy. Kóńil-kúı jaqsy bolsa, án de jaqsy shyǵady, — dedi Rýhııa Baıdúkenova.
Aıta keteıik, buǵan deıin, Qazaqstandyq ánshi Aqerke Amalıat «Slavıan bazarynda» ótken XXXV Halyqaralyq estradalyq án oryndaýshylary baıqaýynda birinshi oryn alǵanyn jazǵan edik.
