Birinshi «KazEOSat-MR» spýtnıgi 2027 jyly orbıtaǵa shyǵarylady

ASTANA. KAZINFORM — Birinshi «KazEOSat-MR» spýtnıgi 2027 jyly orbıtaǵa shyǵarylady. Bul jaıynda Senat depýtattarynyń saýalyna premer-mınıstr Oljas Bektenovtiń jaýabynda aıtylǵan.

— 2023 jyldan beri ǵarysh apparattaryn qurastyrý-synaý kesheninde «KazEOSat‑MR» apparattary toptamasynyń óndirisi uıymdastyrylǵan. Olardyń birinshisi 2027 jyly orbıtaǵa shyǵarylady. Ókiletti organ júrgizilip jatqan jumystardyń nátıjeligin, syrtqy naryqtaǵy básekege qabilettiligin, sonymen qatar atalǵan salaǵa jańa ınvestıtsııalar aǵynyn arttyrý úshin memlekettik satyp alýlardy ońtaılandyrý jáne eksporttyq kelisimsharttar boıynsha salyq salý máselelerin pysyqtap jatyr. Zymyran jasaýdy qarqyndy damytý júzege asyrylyp jatyr. 2021 jyldan beri jobalaý jabdyqtary qurylyp, jobalaý aldyndaǵy jumystar júrgizilýde. Sondaı-aq zymyrandardyń synaq modelderin synaý júzege asyryldy, — dedi Úkimet basshysy.

Premer-mınıstrdiń atap ótýinshe, osy jyldyń sońyna qaraı shaǵyn meteorologııalyq zymyrandy birinshi ret ushyrý kózdelip otyr.

— Boljamǵa sáıkes, 2030 jylǵa qaraı álemde zymyran jasaý naryǵynyń kólemi 113 mlrd dollarǵa deıin artady. Qazirgi ýaqytta Qarjy mınıstrligi 2026-2028 jyldary ǵarysh qyzmeti salasyndaǵy qoldanbaly ǵylymı-zertteý jáne tájirıbelik-konstrýktorlyq jumystardy 8,2 mlrd teńge somasynda qarjylandyrý boıynsha suranysty qarastyryp jatyr, — dedi Oljas Bektenov.

Buǵan deıin «Báıterek» kesheninen birinshi zymyrandy jeltoqsanda ushyrý josparlanǵanyn jazǵan edik.