Birinshi exit poll nátıjesi: referendýmda halyqtyń 86,7%-y jańa Konstıtýtsııany qoldady
ASTANA. KAZINFORM – Exit poll nátıjesinde qazaqstandyqtardyń 86,7%-y referendýmda jańa Ata Zańnyń jobasyn qoldap daýys berdi.
Eýrazııalyq ıntegratsııa ınstıtýtynyń málimetine qaraǵanda, Qazaqstannyń 17 oblysynda, Astana, Almaty jáne Shymkent qalalarynda referendým ýchaskelerinen shyqqan azamattar arasynda saýalnama júrgizildi.
– Saýalnamada 200 referendým ýchaskesin qamtydy. Onyń ishinde 129-y qalada, 71-i aýyldy jerde ornalasty. Saýalnamaǵa jalpy 30 myń respondent qatysty. Olarǵa arnaıy daıarlanǵan suhbat alýshylar face-to-face ádisi arqyly saýal qoıdy. Zertteý nátıjeleriniń qateligi 1%-dan aspaıdy. Kúni boıy jeti ólshem júrgizildi. Aralyq qorytyndylary 9:00-de, 10:30-da, 12:30-da, 14:30-da, 16:30-da, 18:30 jáne 20:30-da jasaldy, - delingen ınstıtýt málimetinde.
Daýys berýshilerge «Siz jańa Konstıtýtsııany qabyldaısyz ba? Qaı jaýap nusqasyn tańdadyńyz?» degen suraq qoıyldy. Exit poll nátıjelerine sáıkes, respondentterdiń 86,7 paıyzy «Iá, qabyldaımyn» dep jaýap bergen. Referendýmǵa azamattardyń qatysýy 75,3 paıyzdy qurady.
Aıta keteıik, búgin Qazaqstanda jańa Ata Zańnyń jobasy boıynsha jalpyulttyq referendým ótti.
Bıyl 12 aqpanda Qazaqstan Respýblıkasynyń jańa Ata Zańynyń qorytyndy jobasy jarııalandy.
Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.
Respýblıkalyq referendýmda berilgen bıýlletende «Jobasy buqaralyq aqparat quraldarynda 2026 jylǵy 12 aqpanda jarııalanǵan Qazaqstan Respýblıkasynyń jańa Konstıtýtsııasyn qabyldaısyz ba?» degen saýal qoıyldy.
Ortalyq referendým komıssııasynyń málimetine qaraǵanda, Qazaqstanda daýys berý quqyǵy bar azamattardyń 73 paıyzdan astamy óz tańdaýyn jasady.