Birinshi exit poll nátıjesi: referendýmda halyqtyń 69,8 paıyzy AES qurylysyn qoldady

ASTANA. KAZINFORM – Exit poll nátıjesinde qazaqstandyqtardyń 69,8 paıyzy referendýmda AES qurylysyn qoldap daýys berdi.

Atap aıtqanda, «Astana – keshendi áleýmettik zertteýler ınstıtýty» jeke qory «Habar» agenttiginiń tapsyrysy aıasynda AES qurylysy máselesi boıynsha respýblıkalyq referendýmda daýys berý kúni exit poll (referendým ýchaskelerinen shyqqan azamattar arasynda saýalnama) ótkizdi.

«Úzdiksiz aǵyn ádistemesiniń kómegimen Qazaqstannyń 189 ýchaskesinde daýys bergen 283 519 azamat qamtyldy. Olardan referendým aıasynda qoıylǵan "Siz Qazaqstanda atom elektr stantsııasyn salýǵa kelisesiz be?» degen suraqqa qalaı jaýap bergeni suraldy. Bul rette, exit poll nátıjesinde AES qurylysyn qoldap, «ıá» dep daýys bergender sany saýalnamaǵa qatysqan adamdardyń 69,8 paıyzyn qurady. Saýalnamaǵa qatysqandardyń 30,2 paıyzy kelisimin bermegen. Ýchaskelerge kelý kórsetkishi 67,3 paıyz deńgeıinde tirkeldi», - dedi «Astana – keshendi áleýmettik zertteýler ınstıtýty» jeke qorynyń taldaýshysy Álibek Tájibaev.

Onyń aıtýynsha, derekterdiń qatelegi shamamen 1,5 paıyz deńgeıinde. 

Eske salaıyq, búgin qazaqstandyqtar atom elektr stantsııasyn salý máselesi boıynsha referendýmda daýys berdi.

6 qazanda el boıynsha 10 249 referendým ýchaskesinde daýys berý bastaldy.

1 shildedegi jaǵdaı boıynsha el kóleminde 12 176 968 adam referendýmda daýys berýge haqyly.

Aıta keteıik, 20:00-degi jaǵdaı boıynsha 7 820 918 azamat bıýlleten aldy. Bul tizimge engizilgen azamattardyń 63,87 paıyzy.