Birneshe ret jedel járdem shaqyrtqan: Kókshetaýda júkti áıel kóz jumdy

Kókshetaýda júktiliktiń sońǵy merziminde bolǵan áıeldi dárigerler qutqaryp qala almady, dep habarlaıdy Kazinform tilshisi.

Jergilikti BAQ jarııalanǵan málimetke qaraǵanda, qaıtys bolǵan áıeldiń ishi aýyryp, qyzýy kóterilgen, sol sebepti jedel járdem brıgadasyn birneshe ret úıine shaqyrtqan. Alaıda, dárigerler naýqasty aýrýhanaǵa jatqyzýǵa asyqpaǵan. Áıel «Viamedis» JShS-de esepte turǵan.

Onyń artynda eki balasy qaldy.

Aqmola oblystyq densaýlyq basqarmasynyń baspasóz qyzmeti júkti áıeldiń qaıtys bolǵanyn rastady. Vedomstvodan atap ótkendeı, qazirgi kezde qyzmettik tekseris júrgizilýde.

«Ana ólimi Kókshetaý qalasynda 23 jeltoqsanda saǵat 5-te tirkeldi. «Ókpe tamyrynyń tromboembolııasy, aýyr dárejedegi JRVI» dıagnozy qoıyldy. Tolyq málimetti qyzmettik tekseristiń jáne sot-medıtsınalyq saraptamanyń qorytyndysy shyqqan soń jarııalaıtyn bolamyz», - dep túsindirdi Kazinform tilshisiniń saýalyna vedomstvonyń baspasóz hatshysy Kámıla Ábdelmanova.

Aıta ketsek, budan buryn Aqmola oblysynda 42 jastaǵy áıel eki kishkentaı balasymen joǵalyp ketkenin jazǵan edik.