Birneshe óńirde jumysshylarǵa 228 mln teńgeden astam jalaqy qaryzy qaıtaryldy
ASTANA. KAZINFORM – Qazaqstannyń birneshe óńirinde memlekettik eńbek ınspektorlarynyń aralasýymen jumyskerlerge tólenbegen 228 mln teńgeden astam jalaqy qaryzy óteldi. Sondaı-aq Túrkistan oblysynda zańsyz jumystan shyǵarylǵan eki mektep dırektory qyzmetine qaıta oraldy.
Eńbek jáne halyqty áleýmettik qorǵaý mınıstrliginiń málimetinshe, Mańǵystaý oblysynda «Aqtaý mashına jasaý kesheni» JShS-niń 101 qyzmetkerine 41,8 mln teńge jalaqy qaryzy tolyq qaıtarylǵan.
Tekserý barysynda kásiporynnyń 2026 jylǵy mamyr-maýsym aılary úshin eńbekaqy tólemegeni anyqtalǵan. Jumys berýshige zańbuzýshylyqty joıý týraly nusqama berilip, bereshek óteldi.
Osy óńirdegi «ıAssy Servıs» JShS-de ústeme jumys úshin aqy tóleý tártibi buzylǵan. Inspektorlardyń aralasýynan keıin qyzmetkerge 290 myń teńge tólendi.
Almatyda 64 kásiporynnyń 117 jumyskerine jalpy somasy 162,1 mln teńge jalaqy qaryzy qaıtaryldy.
Atap aıtqanda, qazan aıynda júrgizilgen tekserý men sot rásimderi aıaqtalǵannan keıin «Total Enerdjıs Marketıng Qazaqstan» JShS qyzmetkerine 89 mln teńge bereshek tólengen.
Aqmola oblysynda «Tlekei-Agro» JShS-niń 27 qyzmetkerine 18,1 mln teńgeden astam jalaqy qaryzy bary anyqtaldy. Jumyskerlerdiń ujymdyq ótinishinen keıin júrgizilgen tekserý aıaqtalǵanǵa deıin jumys berýshi bereshekti tolyq ótegen.
Jambyl oblysynda «Sharapat» jekemenshik mektep-gımnazııasynyń 24 qyzmetkerine 2025 jylǵy tamyz-qarasha aılary úshin 6 mln teńgeden astam jalaqy tólenbegen. Memlekettik eńbek ınspektsııasynyń aralasýymen bul qaryz da tolyq óteldi.
– Memlekettik eńbek ınspektorlary qyzmetkerlerdi zańsyz jumystan shyǵarý jáne olarǵa negizsiz tártiptik jaza qoldaný jaǵdaılarynda da eńbekkerlerdiń quqyqtaryn qalpyna keltirý baǵytynda tıisti sharalar qabyldap keledi, – dep habarlady mınıstrlik.
Máselen, Túrkistan oblysynda eńbek zańnamasyn buza otyryp qyzmetinen bosatylǵan eki mektep dırektory burynǵy laýazymdaryna qaıta taǵaıyndaldy.
Tekserý barysynda kásipodaq múshelerin jumystan shyǵarý kezinde ujymdyq shartta kózdelgen kásipodaq uıymynyń kelisimi alynbaǵany belgili boldy.
Inspektorlar qabyldaǵan sharalardyń nátıjesinde zańbuzýshylyqtar joıylyp, eki dırektor da qyzmetine qaıta oraldy.
Aıta keteıik, buǵan deıin Eńbek jáne halyqty áleýmettik qorǵaý mınıstrligi jalaqy ýaqytynda tólenbegen jaǵdaıda qyzmetkerler memlekettik eńbek ınspektsııasyna shaǵymdana alatynyn túsindirgen edi. Eńbek kodeksine sáıkes jumys berýshi keshiktirilgen ár kún úshin ósimpul tóleýge mindetti.
