Birneshe óńirde jalǵan dıplommen jumys istegen bapkerler áshkerelendi

ASTANA. KAZINFORM – Elimizdiń birneshe aımaǵynda jalǵan dıplommen jumys istegen bapkerler men sport mektebiniń basshylary anyqtaldy. Tolyǵyraq Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov aıtyp berdi.

- Bapkerlik jáne sport qyzmeti salasynda jalǵan dıplom paıdalanýdyń 278 faktisi anyqtaldy. (onyń ishinde 9 basshy bar, 248 jattyqtyrýshy jáne 21 basqa da qyzmetker bar). Mundaı faktilerdiń basym kópshiligi Túrkistan (44), Atyraý (30), Almaty (26), Jambyl (22) jáne Aqmola (20) oblystarynda anyqtaldy. Mysaly, Astana qalasynda olımpıadalyq rezervtiń balalar-jasóspirimder sport mektebiniń basshylarynyń biri joǵary bilim týraly jalǵan dıplommen jumys istegen. Onyń oqý barysynda basqa sport uıymynda nusqaýshy qyzmetin atqarǵany anyqtaldy, - dedi Danııar Bıgaıdarov agenttikte ótken baspasóz máslıhaty barysynda.

Odan bólek, Mańǵystaý oblysynda olımpıadalyq rezervtiń oblystyq mamandandyrylǵan balalar-jasóspirimder sport mektebiniń dırektorynyń orynbasary da jalǵan dıplommen jumys istegen.

- Barlyq fakti boıynsha materıaldar ishki ister organdaryna berildi, qazir aldyn ala tergeý jumystary júrgizilýde. Qabyldanǵan sharalar aıasynda 250 adammen eńbek kelisimsharty buzyldy. Qalǵandary boıynsha jumystan bosatý máselesi tergeý nátıjeleri boıynsha sheshiledi, - deıdi ol.

Aıta ketsek, elimizde zańdy tulǵalardyń jemqorlyq qylmystaryna jaýapkershiligi kúsheıtiledi.