Birneshe óńirde topyraq áli erigen joq – Qazgıdromet

ASTANA. KAZINFORM – Qostanaı, Aqmola, Pavlodar jáne Soltústik Qazaqstan oblystarynyń basym bóliginde, Qaraǵandy jáne Shyǵys Qazaqstan oblystarynyń keı aýdandarynda topyraq áli erigen joq. Bul týraly «Qazgıdromet» RMK baspasóz hatshysy Alına Ismagýlova aıtyp berdi.

«Qostanaı oblysynyń soltústigi men ortalyǵynda topyraqtyń qatý tereńdigi burynǵysynsha 75-84 sm-den 140-150 sm-ge deıin saqtalýda. Soltústik Qazaqstan oblysynda qatý tereńdigi birkelki emes – tereńdigi 40-112 sm aralyǵynda ózgeredi», - dedi spıker Respýblıkalyq aqparattyq shtabta ótken brıfıngide.

Aqmola oblysynda topyraqtyń tolyq erýi Arshaly, Ereımentaý, Egindikól, Qorǵaljyn jáne Sandyqtaý, Zerendi aýdandarynda baıqalady.

Al Atbasar, Esil, Astarahan aýdandarynda orta eseppen 30-dan 75 sm-ge deıingi qabatta, Birjan sal, Tselınograd, Shortandy, Aqkól, Jaqsy, Býrabaı aýdandarynda jáne Kókshetaý qalasynyń mańaıynda qatý tereńdigi 109-166 sm, erýi – 30-56 sm.

Qaraǵandy oblysynda tek Osakarov aýdanynda 44-150 sm topyraq qatqan.

«Pavlodar oblysynda – qatqan topyraq qabatynyń qalyńdyǵy 30-40-tan 140 sm-ge deıin, keı jerlerde 200 sm-den asady. Al oblystyń soltústik-shyǵysynda 275 sm deıin jetedi. Tolyq erý Ertis jáne ishinara Pavlodar, Aqtoǵaı, Sharbaqty aýdandarynda baıqalady. Shyǵys Qazaqstan jáne Abaı oblystarynda Besqaraǵaı, Borodýlıha, Ulan, Katonqaraǵaı aýdandarynda 72–100 sm deıingi topyraq qatýy tirkelgen. Glýbokoe jáne Altaı aýdandarynda – 32-43sm. Qalǵan aýmaqtarda topyraq tolyǵymen erigen», - dedi Qazgıdromet ókili.