Birneshe óńirde memlekettik aýdıt salasyndaǵy zań buzý anyqtaldy

ASTANA. KAZINFORM – Joǵary aýdıtorlyq palatanyń tóraǵasy Álıhan Smaıylov tekserý komıssııalarynyń basshylaryna anyqtalǵan kemshilikterdi joıý jóninde talap qoıdy. Bul týraly Joǵary aýdıtorlyq palatanyń baspasóz qyzmeti habarlady. 

Joǵary aýdıtorlyq palatasynda Memlekettik aýdıt jáne qarjylyq baqylaý organdarynyń úılestirý keńesiniń 13-otyrysy ótti. Іs-sharaǵa Joǵary aýdıtorlyq palatanyń, Qarjy mınıstrliginiń jáne óńirlik tekserý komıssııalarynyń ókilderi qatysty.

Jıynda memlekettik aýdıt organdarynyń 2024 jylǵy qyzmetin baǵalaý qorytyndysy shyǵaryldy. 20 tekserý komıssııasynyń ishinen 14-iniń nemese 70%-ynyń jumysy tıimdi dep baǵalandy, bul ótken jylmen salystyrǵanda 15%-ǵa kóp. Qalǵan tekserý komıssııalarynyń jumysy «qanaǵattanarlyq» dep baǵalandy.

Qatysýshylar anyqtalǵan zań buzýdy egjeı-tegjeıli talqylady. Atap aıtqanda, eń tómen nátıje kórsetken Abaı, Almaty, Qostanaı jáne Túrkistan oblystarynyń, sondaı-aq Almaty qalasynyń tekserý komıssııalary basshylarynyń esepteri tyńdaldy.

Talqylaýdy qorytyndylaı kele, Joǵary aýdıtorlyq palatanyń tóraǵasy Álıhan Smaıylov tekserý komıssııalarynyń basshylaryna anyqtalǵan kemshilikterdi joıý jóninde talap qoıdy.

— Aqmola, Qostanaı, Pavlodar, Túrkistan oblystarynyń jáne Almaty qalasynyń tekserý komıssııalarynyń tóraǵalary 1 shildege deıin Joǵary aýdıtorlyq palataǵa Úılestirý keńesi sheshimderiniń tıisinshe oryndalmaýyna jol bergen qyzmetkerlerdi jaýapqa tartý týraly aqparat berýi tıis, — dedi Álıhan Smaıylov.

Otyrysta Qarjy mınıstrliginiń Іshki memlekettik aýdıt komıtetine memlekettik organdardyń basshylaryna memlekettik aýdıt standarttaryn buzýǵa jol bergen qyzmetkerlerdi jaýapkershilikke tartý týraly usynystar daıyndaý tapsyryldy. Bul másele Bas prokýratýranyń, Almaty, Qostanaı oblystary men Astana qalasy ákimdikteriniń ishki memlekettik aýdıtorlaryna qatysty bolyp otyr.

Qarjy mınıstrliginiń Іshki memlekettik aýdıt komıteti ishki aýdıt qyzmetteriniń jumysyn kúsheıtý úshin tıimdilik aýdıtiniń ádistemelerin ázirleý grafıgin daıyndaıdy. Sonymen qatar Joǵary aýdıtorlyq palata atalǵan taqyrypta respýblıkalyq semınar ótkizedi.

Otyrysta memlekettik aýdıt júıesin tsıfrlyq transformatsııalaý máselesi talqylandy. Aqparattyq júıelerdi ýaqytyly ıntegratsııalaýdyń jáne rásimderdi avtomattandyrýdyń mańyzdylyǵy atap kórsetildi.

— Joǵary aýdıtorlyq palata óziniń aqparattyq júıesin avtomattandyrý boıynsha aýqymdy jumys istedi. Endi tekserý komıssııalary derekterdi jańa tsıfrlyq platformaǵa ýaqytyly jáne tolyq engizýdi qamtamasyz etýi tıis, — dep atap ótti tóraǵa.

Álıhan Smaıylov jyl sońyna deıin «Memlekettik aýdıt obektisiniń kabıneti» modýlin synaqtan ótkizýdi aıaqtap, ony barlyq óńirlik tekserý komıssııalaryna engizýdi tapsyrdy.

Bul protseske qatysty táýekelderdi basqarý júıesimen jumys isteý boıynsha oqytý semınary ótedi.

Jıyn sońynda bultty býhgalterııa júıesi arqyly qashyqtan aýdıt júrgizýge kóshý perspektıvalary qaraldy. Qarjy mınıstrliginiń Іshki memlekettik aýdıt komıtetine ortalyq memlekettik organdardyń shoǵyrlandyrylǵan qarjylyq eseptiligine aýdıt júrgizýdi úılestirý úshin osy júıeniń algorıtmi men ony kezeń-kezeńimen engizý josparyn ázirleý tapsyryldy.

Aıta ketelik ıýıýdjetke 135 mlrd teńge qaıtarylǵany týraly Álıhan Smaıylov Prezıdentke esep bergen edi.